पिंपरी : मागील महिन्यापासून अधिक काळापासून ठिकठिकाणी अडकून पडलेल्या नागरिकांना त्यांच्या इच्छित स्थळी ने-आण करण्याच्या दृष्टीने तयारीत रहाण्याचे आदेश वल्लभनगर एसटी आगाराला देण्यात आले आहेत. त्यानुसार आगार व्यवस्थापनाकडून पूर्वतयारी केली जात आहे. या नागरिकांना त्यांच्या शेवटच्या इच्छित स्थानकावर सोडले जाणार आहे. तसेच प्रवासी वाहतूक करण्यापूर्वी एसटी गाड्यांचे निर्जुंतूकीकरण देखील केले जाणार आहे. 

ताज्या बातम्यांसाठी डाऊनलोड करा ई-सकाळचे ऍप

राज्यात टाळेबंदी लागू झाल्यानंतर काही दिवसांनी राज्य मार्ग परिवहन महामंडळाची (एसटी) प्रवासी वाहतूकदेखील थांबविण्यात आली आहे. त्यामुळे असंख्य नागरिक ठिकठिकाणी अडकून पडले आहेत. जिल्हा प्रशासनाकडून पुणे शहर, पिंपरी-चिंचवड आणि जिल्ह्याच्या इतर भागांत अडकलेल्या नागरिकांना त्यांच्या इच्छित स्थळी ने-आण करण्यासाठी हालचाली सुरू झाल्या आहेत. त्यामुळे एसटी प्रशासनदेखील सतर्क झाले आहे. 

वल्लभनगर एसटी स्थानकप्रमुख पल्लवी पाटील म्हणाल्या, "शहरात अडकलेल्या नागरिकांची प्रवासी वाहतूक सुरू करण्याबाबात विभागीय नियंत्रक, पुणे कार्यालयाकडून आदेश येतील. त्यानुसार, जिल्हा प्रशासनाच्या अटी-शर्तीवर प्रवासी वाहतूक सुरू केली जाईल. तूर्तास, आम्हाला केवळ तयारीत राहण्याच्या सूचना मिळाल्या आहेत. विभाग नियंत्रक कार्यालयाकडून प्रवाशांची यादी आल्यावर पोलिसांचे प्रवासाला परवानगी दिल्याचे प्रमाणपत्र, आधारकार्ड, शासकीय ओळखपत्र हे तपासून प्रवासी वाहतूक केली जाईल.

यामध्ये प्रवाशाला मधेच कुठेही उतरता येणार नाही. लांब पल्ल्याच्या गाड्यांतील प्रवाशांच्या नैसर्गिक विधी, चहा, नाष्टा, जेवणासाठी महामंडळाकडील नोंदणीकृत ठिकाणीच तात्पुरता थांबा घेता येईल. वल्लभनगर एसटी स्थानकातील 60 टक्के वाहक-चालक आणि यांत्रिकी कार्यशाळेतील कर्मचारी हे बाहेरगावचे असून सध्या आपापल्या गावी आहेत. त्यांना कामावर येण्याच्यादृष्टीने तयारीत रहाण्याच्या सूचना देण्यात आल्या आहेत.'' 

पिंपरी चिंचवडच्या बातम्या वाचण्यासाठी येथे ► क्लिक करा

काय आहेत, इतर सूचना :

• एसटी प्रवासी वाहतूक केवळ शहरात अडकलेल्या आणि बाहेरगावी अडकून पडलेल्या तसेच शहरात परतण्यासाठी इच्छूक असलेल्या नागरिकांसाठीच राहणार. 
•  नियमित प्रवासी वाहतूक सुरू करण्याचे आदेश नाहीत. त्यामुळे नागरिकांनी स्थानकात येऊन विनाकारण चौकशी अथवा गर्दी करू नये. 
• प्रत्येक प्रवाशाला मास्क वापरणे अनिवार्य, प्रत्येक आसनावर केवळ एक प्रवासी राहणार 
• वल्लभनगर आगारातील कर्मचारी संख्या : वाहक 92, चालक 77, यांत्रिक कर्मचारी 33 
•  एसटी गाड्यांचे निर्जंतुकीकरण करण्याच्यादृष्टीने, आगार व्यवस्थापनाला 200 लिटर्स सॅनिटायझर मिळाले. 
• इच्छित स्थळी उतरल्यावर प्रवाशांना त्यांच्या नावाच्या यादीसह संबंधित शहर, जिल्ह्याच्या नोडल ऑफिसरला सोपविले जाणार.