पिंपरी : राज्यातील सर्व कर्मचाऱ्यांना सातव्या वेतन आयोगातील तरतुदीप्रमाणे आश्‍वासित प्रगती योजना लागू झालेली आहे. परंतु, शिक्षकांना वगळण्यात आले आहे. त्यामुळे शिक्षकांमध्ये असंतोषाची भावना निर्माण झाली आहे.
पुणे जिल्हा परिषदेने नुकतीच 10 वर्षे पूर्ण झालेल्या 77 ग्रामसेवकांच्या वेतनश्रेणीमध्ये वाढ दिली आहे. मात्र, बक्षी समितीनुसार वर्ग-तीन व वर्ग-चार या कर्मचाऱ्यांना पदोन्नतीच्या संधी मिळत नाहीत. त्यामुळे एकाच पदावर सेवेची 10, 20 व 30 वर्षे पूर्ण करणाऱ्या कर्मचाऱ्यांसाठी आश्‍वासित प्रगती योजनेची शिफारस केली होती. मात्र, त्यामधून केवळ शिक्षकांनाच वगळले आहे. प्राथमिक, माध्यमिक शिक्षक वर्ग-तीनमध्ये येत असताना आणि शिक्षकांनाही पदोन्नतीच्या संधी फारशा उपलब्ध नसतात. एरवी निवडणुका, जनगणना, बीएलओसारख्या राष्ट्रीय कार्यासाठी प्राधान्याने शिक्षकांना घेतले जाते. सध्या कोरोना काळातही शिक्षक चेक पोस्ट, गाव, शहराचे सर्वेक्षण, गोळ्या, औषधे वाटपात आरोग्य विभागाला सहकार्य, रेशन दुकानावर नियमन, तालुका नियंत्रण कक्षामध्ये कार्य, तसेच कोविड केअर सेंटरवरही आपले कर्तव्य बजावीत आहेत.
मुळशी तालुका शिक्षक संघाचे अध्यक्ष शहाजी मारणे म्हणाले, "आश्‍वासित प्रगती योजनेपासून शिक्षकांना वंचित ठेवून शिक्षकांवर अन्याय झाला आहे. तो दूर करण्यासाठी प्राथमिक शिक्षक संघ कठोर संघटनात्मक निर्णय घेणार आहे.'' पदवीधर शिक्षक सुरेश कोळी म्हणाले, "शिक्षकांना पदोन्नतीच्या म्हणजे केंद्रप्रमुख, विस्तार अधिकारी सारख्या संधी अत्यंत कमी असतात. इतर कर्मचाऱ्यांप्रमाणेच शिक्षकांना आश्‍वासित प्रगती योजना लागू करून सरकारने समान न्याय करावा.''
शिक्षकांना जुन्याच पद्धतीने अनेक जाचक अटींची पूर्तता केल्यानंतर 12 वर्षांनी वरिष्ठ वेतनश्रेणी दिली जाते. 24 वर्षांनी दिली जाणारी निवडश्रेणी सर्वांना सरसकट दिली जात नाही. राज्यातील अनेक जिल्हा परिषदांनी दोन दशके उलटूनही एकाही शिक्षकाला निवडश्रेणी दिलेली नाही.
- संजय बोरसे, पदवीधर शिक्षक, जिल्हा परिषद प्राथमिक शाळा
शिक्षकांसाठी वेगळ्या योजना आहेत. त्यांना वरिष्ठ वेतन श्रेणी लागू केली जाते. आश्‍वासित प्रगती योजना हा सरकारचा धोरणात्मक निर्णय आहे.
- सुनील कुऱ्हाडे, प्राथमिक शिक्षणाधिकारी, पुणे जिल्हा परिषद
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.