पिंपरी : कोरोनाच्या संकटामुळे अनेक दिवसांपासून  अडकून पडलेल्या परराज्यातील कर्मचाऱ्यांना आपल्या गावी जाण्याची परवानगी केंद्र सरकारने दिली असतानाच, दुसरीकडे खिशात पैसे नसल्यामुळे हे लोक आपल्या मालकांकडे आर्थिक मदत करण्याची मागणी करत आहेत. मात्र, लॉकडाउनमुळे सर्वच ठप्प असल्यामुळे आपले पैसे देखील अडकले आहेत, त्यामुळे या कर्मचाऱ्यांना मदत करायची कशी, अशा विवंचनेत उद्योजक सापडले आहेत. 

ताज्या बातम्यांसाठी डाऊनलोड करा ई-सकाळचे ऍप

केंद्र सरकारने अडकून पडलेल्या परराज्यातील कर्मचाऱ्यांना आपल्या गावी जाता यावे, यासाठीची नियमावली जाहीर केली आहे. त्यानुसार राज्य सरकारने कामाला सुरुवात केली आहे. कोरोनाला सुरुवात झाल्यानंतर अनेकजणांनी इथे न थांबता आपल्या गावाकडील वाट धरली होती. मात्र, लॉकडाउन सुरू झाल्यानंतर येथे अडकून पडलेले अनेकजण गावाकडे जाण्याची वाट पाहात होते. दरम्यान, या कर्मचाऱ्यांकडे असणारी रक्‍कम संपली असल्याने गावाकडे गेल्यावर संसार चालवण्याची तरतूद व्हावी, म्हणून हे लोक ज्याठिकाणी काम करत होते, त्यांच्याकडे आर्थिक मदत देण्याची विनंती करत आहेत. मात्र, लॉकडाउनमुळे सगळेच बंद आहे. 

पुण्याच्या बातम्या वाचण्यासाठी येथे ► क्लिक करा 

गेल्या महिन्यातील कर्मचाऱ्यांचे पगार अनेकजणांनी खिशातले पैसे घालून केले, तर काहीजणांनी बॅंकेतून कर्ज काढून कर्मचाऱ्यांना पगाराची रक्‍कम दिली आहे, त्यामुळे उद्योजकांकडे देखील पुरेशी रक्‍कम नाही. त्यामुळे परराज्यातील कर्मचाऱ्यांना आर्थिक मदत करायची कशी, असा प्रश्‍न त्यांना सतावतो आहे. दरम्यान, उद्योगनगरीमधे परराज्यातील अनेकजण काम करतात.

पुण्याच्या बातम्या वाचण्यासाठी येथे ► क्लिक करा 

लॉकडाउन सुरु होण्याअगोदर त्यापैकी अर्धेअधिक लोक आपल्या गावी गेले आहेत. आता उर्वरित लोक जाण्याच्या तयारीत आहेत. गावी गेल्यावर आपली घडी बसावी, यासाठी थोड्या फार प्रमाणात आर्थिक मदत देण्याची मागणी उद्योजकांकडे केली आहे. मात्र, दीड महिन्यांपासून मोठे उद्योग बंद असल्यामुळे उद्योजकांची थकित असणारी रक्‍कम हातात पडलेली नाही. त्यामुळे या लोकांना मदत करण्यात अडचणी येत असल्याचे पिंपरी-चिंचवड लघुउद्योजक संघटनेचे अध्यक्ष संदीप बेलसरे यांनी सांगितले.