पिंपरी : शहरातील तीन उड्‌डाणपूलांवर वाढणाऱ्या वड आणि पिंपळांच्या झाडांमुळे त्यांचा धोका वाढला आहे. या पुलांच्या यादीमध्ये निगडी परिसरातील मधुकर पवळे उड्‌डाणपूल, भोसरी परिसरातील राजमाता जिजाऊ उड्‌डाणपूल, चिंचवड स्टेशन उड्डाणपूल व आकुर्डीतील दळवीनगर भागातील पुलाचा समावेश आहे. याखेरीज जुन्या पुणे- मुंबई महामार्गावरील ग्रेडसेपरेटरमध्ये देखील ही समस्या निर्माण झाली आहे. 

ताज्या बातम्यांसाठी डाऊनलोड करा ई-सकाळचे ऍप   

निगडी भागातील टिळक चौक, भोसरी परिसर आणि चिंचवडमधील चापेकर चौक या परिसरात मोठ्या प्रमाणात वाहतूक कोंडीची समस्या निर्माण व्हायची. त्यामुळे महापालिकेने याठिकाणी उड्‌डाणपूल उभारले. मात्र, सध्या या तिन्ही पुलावर वड आणि पिंपळाची झाडे वाढली आहेत. या झाडांची मुळे पसरू लागल्यामुळे या पुलाला तडे जाऊन धोका निर्माण होण्याची शक्‍यता आहे. 

दरम्यान, जुन्या पुणे-मुंबई महामार्गावरील हॅरिस पूलावर देखील पूर्वी ही समस्या होती. मात्र, मध्यंतरी हाती घेतलेल्या देखभाल दुरुस्तीच्या कामादरम्यान वारंवार वड आणि पिंपळाची झाडे येणाऱ्या जागांवर केमिकल प्रक्रिया करुन हा प्रश्‍न सोडवण्यात आला आहे. शहरातील या तिन्ही पुलांच्या बरोबरच ग्रेडसेपरेटरमध्येदेखील अशा प्रकारची प्रक्रिया करण्याची आवश्‍यकता आहे. मुंबई-बेंगळुरू महामार्गावरील किवळे पुलावर देखील ही झाडे आल्यामुळे तिथला धोकादेखील वाढला आहे. हा पूल राष्ट्रीय महामार्ग प्राधिकरणाच्या अखत्यारित येतो. त्यामुळे तातडीने त्यांनी डागडुजी करण्याची मागणी या भागातील नागरिकांकडून करण्यात आली आहे. 

पिंपरी चिंचवडच्या बातम्या वाचण्यासाठी येथे ► क्लिक करा

महापालिका म्हणते लॉकडाउनचा फटका...

पुलावर वाढणारी झाडे काढण्याचे काम हे दरवर्षीच्या उन्हाळ्यामध्ये करण्यात येते. यंदा कोरोनाच्या संसर्गामुळे मार्च महिन्यापासून लॉकडाउन सुरू झाला. त्यामुळे शहरातील देखभाल दुरुस्तीचे कामे पूर्ण होऊ शकली नाहीत. आता पावसाला सुरुवात झाली असताना देखील शहरात अनेक ठिकाणी राहिलेली रस्त्याच्या डांबरीकरणाची कामे पूर्ण करण्यात येत आहेत. सध्या पावसाने उघडीप घेतलेली आहे. त्यामुळे शहरात ज्या उड्‌डाणपुलांवर अशा प्रकारची झाडे वाढली आहेत. ती काढून टाकण्याचे काम तातडीने हाती घेण्यात येणार असल्याचे महापालिकेच्या बीआरटी विभागाचे प्रवक्‍ते विजय भोजने यांनी सांगितले. 

पुण्याच्या बातम्या वाचण्यासाठी येथे ► क्लिक करा