पिरंगुट, ता. २८ : येथील (ता.मुळशी) सनशाईन जॅाय पवळे प्लाझामध्ये आयोजित रक्तदान शिबिरात ५७१ जणांनी रक्तदान केले. श्री शिवप्रतिष्ठान हिंदुस्थान, मुळशीच्या वतीने धर्मवीर छत्रपती श्री संभाजी महाराज यांच्या बलिदानमासानिमित्त या महारक्तदान यज्ञाचे आयोजन केले होते. शिवछत्रपती आणि संभाजी महाराज यांच्या परंपरेतील असंख्य नरवीरांनी देव, देश आणि धर्मासाठी स्वतःच्या प्राणांची आहुती दिली. त्यांच्या ऋणातून मुक्त झाले पाहिजे याच उदात्त भावनेने हा रक्तदान यज्ञ संपन्न झाला. या महारक्तदान यज्ञात तालुक्यातील ५७१ तरुणांनी उत्स्फूर्त प्रतिसाद देत निरपेक्ष भावनेने रक्तदान केले. पुणे येथील लोकसेवा सोशल फाउंडेशन व पुणे ब्लड सेंटरने सहकार्य केले.
यावेळी जिल्हा परिषदेचे माजी सदस्य शंकर मांडेकर यांनीही रक्तदान केले. यावेळी चांगदेव पवळे, प्रकाश पवळे, रमेश पवळे, भीमाजी गोळे, रामभाऊ पवळे, तुषार पवळे, राजू पवळे, राहुल पवळे, प्रवीण कुंभार, विकास पवळे, रामदास गोळे, तसेच शिवप्रतिष्ठान हिंदुस्थान मुळशीचे सर्व कार्यकर्ते उपस्थित होते.