वडगाव मावळ - मावळ तालुक्यातील निगडे येथील एका पॉलिहाउसमधील कामगार चाळीत पत्नीचा खून (Wife Murder) करून तिने गळफास घेऊन आत्महत्या (Suicide) केल्याचा बनाव रचणाऱ्या एका परप्रांतीय तरुणाला वडगाव पोलिसांनी (Police) अटक (Arrested) केली. ही घटना सोमवारी रात्री घडली.

सुनील रूपचंद बंजारे (वय २७, मूळ रा. चुरतेला, पो. खरखोद ता. पामगड, जि. जहांगीर चांपा, छत्तीसगड, हल्ली रा. विनय गोपाळ सांबारे यांचे पॉलिहाउसच्या आवारामधील कामगार चाळ, निगडे ता. मावळ) असे याप्रकरणी अटक करण्यात आलेल्या परप्रांतीय तरुणाचे नाव आहे. सतरूपा सुनील बंजारे (वय २४) असे खून झालेल्या महिलेचे नाव आहे. अरुणकुमार भारद्वाज (वय १९, सध्या रा. निगडे) याने याबाबत फिर्याद दिली आहे.

वडगावचे पोलिस निरीक्षक विलास भोसले यांनी दिलेल्या माहितीनुसार, आरोपी सुनील हा निगडे येथे विनय सांबारे यांच्या पॉलिहाऊसमध्ये मजूर म्हणून कामाला आहे. व तेथील कामगार चाळीत पत्नीसह राहत होता. सोमवारी रात्री त्याने मारहाण करून व गळा दाबून तिचा खून केला. कोणाला काही समजू नये म्हणून ओढणीच्या साह्याने खोलीच्या छताच्या अँगलला लटकवून तिने गळफास घेतल्याचा व स्वतः झोपेत असल्याचा बनाव रचला. खुनाचे कारण समजू शकले नाही. उपविभागीय पोलिस अधिकारी पाटील व पोलिस निरीक्षक विलास भोसले यांच्या मार्गदर्शनाखाली पोलिस उपनिरीक्षक वडोदे पुढील तपास करीत आहेत.