पिंपरी, ता. १ : कुटुंबात जन्मलेल्या कन्यारत्नाचे ''मेरे घर आयी एक नन्हीं परी'' असे म्हणत ग्रँड स्वागत करण्याचा ट्रेंड सध्या शहर व परिसरात रुजत आहे. लक्ष्मीच्या रूपाने चिमुकली घरात पहिलं पाऊल टाकताना एखाद्या सणाप्रमाणे आनंद सोहळा साजरा केला जात असल्याचे सध्या दिसून येत आहे. यातून एकप्रकारे ''बेटी बचाव''चा संदेश दिला जात आहे.

मुलगी जन्माला आली की, विवाहितेला दोष देण्यासह कुटुंबातही कलह होत. मुलगी म्हणजे परक्या घरचे धन, अशी भावना होती. मात्र, आता मुलीच्या जन्माचा द्वेष करणाऱ्यांचे प्रमाण काही प्रमाणात कमी होताना दिसत आहे. वंशाला दिवा असावा म्हणून मुलगाच हवा, असा हट्ट धरणाऱ्यांचा जमाना आता गेला आहे. नकोशी वाटणारी मुलगी हवीहवीशी वाटू लागली आहे. त्यामुळे कुटुंबात मुलगी जन्माला आल्यानंतर आता मोठे सेलिब्रेशन केले जात असून इतर सोहळ्याप्रमाणेच कन्यारत्न स्वागताचाही सोहळा साजरा होत आहे. कन्यारत्न घरी येण्याचा पहिला दिवस म्हणजे कुटुंबासाठी आनंद सोहळाच असल्याचे दिसून येत आहे.

कन्या घरी येताच घरातील सुवासिनी कन्येसह तिच्या आईला औक्षण करतात. ते येणाऱ्या मार्गावर फुलांच्या पायघड्या घातल्या जातात. यासह घराला सुंदर सजावट करून गोडधोड जेवण केले जाते. लक्ष्मीच्या रूपाने चिमुकली आपल्या घरी आली, या भावनेने तिची पाऊलं कुंकवाच्या पाण्यात भिजवून घरात उमटविली जातात. त्यानंतर देवघरात दर्श घेऊन चिमुकलीला आकर्षक फुलांनी सजविलेल्या पाळण्यात ठेवले जाते.
सर्व कुटुंबीय एकत्र येत फटाक्याची आतषबाजी, फोटो शूट, शुभेच्छा देत हा आनंद सोहळा रंगतो. पिंपरी-चिंचवड शहरासह परिसरातही अशाप्रकारे चिमुकलीचे स्वागत करण्याचा चांगला ट्रेंड रुजत असल्याचे दिसून येत आहे.
----------
सोशल मीडियावरही स्वागत
‘आमच्या घरी लक्ष्मी आली’, ‘मेरे घर आयी नन्हीं परी’, ‘बेटी धनाची पेटी’ अशा पोस्टसह घरातील स्वागताचे व्हिडिओ सोशल मीडियावर अपलोड केले जात आहेत. त्यामुळे सोशल मीडियावरही चिमुकलीचे जोरदार स्वागत होत असून शुभेच्छांचा वर्षाव होतो.
------------------------------------------
''बेटी बचाव''चा संदेश
अशा प्रकारे कन्येच स्वागत करून ''बेटी बचाव''चाही संदेश दिला जात आहे. मुलगा-मुलगी असा भेदभाव न करता मुलाप्रमाणे मुलगीही तितकीच महत्वाची असल्याचे पटवून दिले जात आहे.
-----------------------
आम्हाला मुलगीच हवी होती. मुलगी म्हणजे मायेचा सागर आहे. मुलगी झाल्यानंतर माझ्यासह कुटुंबियांना खूप आनंद झाला. लाडक्या लेकीचं जल्लोषात स्वागत करण्यासाठी अगोदरपासूनच तयारी केली होती. सर्व कुटुंबियांनी एकत्र येत ग्रॅंड वेलकम केले. हा क्षण आमच्यासाठी सर्वोच्च आनंदाचा होता.
- नीलेश गिलबिले, भोसरी
---------------------