पिंपरी, ता. ३ ः महापालिकेची जानेवारी महिन्याची सर्वसाधारण सभा ऑनलाइन होणार आहे. ओमीक्रॉनमुळे कोरोना संक्रमणाची संख्या झपाट्याने वाढत असल्याने महापालिकेच्या सर्व सभा व्हिडिओ कॉन्फरन्सिंगद्वारे, ऑनलाइन पद्धतीनेच घेण्यात याव्यात, असा आदेश नगरविकास विभागाने दिला आहे. त्यानुसार ही सभा ऑनलाइन होणार आहे.

आता राज्यात पुन्हा कोरोना रुग्णसंख्येत वाढ होत आहे. महानगरांमध्ये ओमीक्रॉनमुळे बाधितांची संख्या झपाट्याने वाढत आहे. शासनाने याची गंभीर दखल घेतली असून मोठ्या प्रमाणावरील एकत्रीकरण टाळण्यासाठी निर्बंध विहित केले आहेत. सद्यःस्थितीत कोरोनाच्या रुग्णसंख्येत मोठी वाढ होत असल्याने महापालिकांच्या सर्व बंधनकारक सभा, बैठका ऑनलाइन घ्याव्यात. महासभा, स्थायी समिती व इतर सर्व वैधानिक समित्यांच्या सर्व बंधनकारक बैठका व्हिडिओ कॉन्फरन्सिंगद्वारे, ऑनलाइन पद्धतीनेच घेण्यात याव्यात. राज्यातील कोरोना संक्रमण परिस्थितीचा आढावा, एक महिन्यानंतर वस्तुस्थिती व तपशिलाच्या आधार घेऊन या संदर्भातील पुढील निर्णय कळविण्यात येईल असे शासनाने स्पष्ट केले आहे.

याबाबत नगरसचिव उल्हास जगताप म्हणाले, ‘‘कोरोनाच्या वाढत्या प्रसारामुळे राज्य सरकारने सर्व सभा ऑनलाइन घेण्याचे आदेश दिले आहेत. त्यानुसार सर्व सभा ऑनलाइन पद्धतीने घेतल्या जातील.’’
-------
तर ठरेल अखेरची सभा
पंचवार्षिक निवडणूक मार्चमध्ये होईल असे मानले जात असल्याने ही सभा अखेरची ठरेल. कोरोनाच्या पहिल्या, दुसऱ्या लाटेत महापालिकेच्या सभा ऑनलाइनच होत होत्या. परंतु, कोरोनाची रुग्ण संख्या आटोक्यात आल्याने राज्य शासनाने २२ ऑक्टोबर २०२१ रोजी सभा ऑफलाइन पद्धतीने घेण्याची परवानगी दिली होती.