पुणे, ता. २४ : मुक्तांगण व्यसनमुक्ती केंद्राच्या संस्थापक डॉ. अनिता अवचट यांच्या स्मृतीप्रित्यर्थ देण्यात येणारा ‘डॉ. अनिता अवचट स्मृती संघर्ष सन्मान’ यंदा ‘महान ट्रस्ट, मेळघाट’ आणि ‘तारा मोबाईल क्रेशेस, पुणे’ या संस्थांना देण्यात येणार आहे. ‘मुक्तांगण’च्या संचालक डॉ. मुक्ता पुणतांबेकर यांनी ही माहिती दिली.

मेळघाटासारख्या अतिदुर्गम भागात आरोग्य सेवा पुरवण्यासाठी डॉ. कविता आणि डॉ. आशिष सातव यांनी ‘महान ट्रस्ट’ची स्थापना केली. या भागातील बालमृत्यू आणि कुपोषण या समस्या सोडवण्यासाठी ही संस्था कार्यरत असून आजवर सुमारे एक लाखांहून अधिक रुग्ण आणि पन्नास हजारांहून अधिक कुपोषित मुलांसाठी या संस्थेने कार्य केले आहे.

‘तारा मोबाईल’ ही संस्था गेल्या तीन दशकांहून अधिक काळ बांधकाम मजुरांच्या मुलांसाठी कार्यरत आहे. या मुलांचे आरोग्य, पोषण, शिक्षण आणि विकासासाठी संस्था कार्य करत आहे. या संस्थांच्या कार्याची दखल घेऊन त्यांना यंदाचा हा पुरस्कार देण्यात येणार आहे. प्रत्येकी वीस हजार रुपये आणि स्मृतिचिन्ह, असे या पुरस्काराचे स्वरूप आहे. नवी पेठेतील एस. एम. जोशी सभागृहात येत्या ६ फेब्रुवारीला सकाळी ११ वाजता
पुरस्कार वितरण होणार आहे. या वेळी मुक्तांगणचे अध्यक्ष डॉ. आनंद नाडकर्णी पुरस्कारार्थ्यांशी संवाद साधणार असल्याचे पुणतांबेकर यांनी सांगितले.