पुणे, ता. २४ : कोरोनाच्या पार्श्वभूमीवर पीएमपीने प्रवाशांना कोरोना लशीचे दोन डोस घेतल्याचे प्रमाणपत्र दाखवणे बंधनकारक केले आहे. परंतु, हा नियम आता वाहकांसाठी डोकेदुखी ठरत आहे.

पीएमपीने प्रवास करण्यासाठी नागरिकांना आत कोरोना प्रतिबंधक लशीचे दोन डोस घेतल्याचे प्रमाणपत्र वाहकांना दाखवावे लागत आहे. प्रशासनाने याबाबत परिपत्रक काढून त्याची कडक अंमलबजावणी करण्याचे आदेश दिले आहेत. परंतु गर्दीच्या वेळेस प्रवाशांचे टिकीट काढायचे की प्रमाणपत्र पाहायचे, असा सवाल वाहकांकडून उपस्थित केला जात आहे.

प्रवासी बसमध्ये बसताना प्रमाणपत्र असल्याचे सांगतात; पण प्रत्यक्षात प्रमाणपत्र दाखवण्याची विनंती केल्यानंतर घरी राहीले, विसरलो, असे वेगवेगळी कारणे त्यांच्याकडून सांगण्यात येतात. प्रमाणपत्र नसलेल्या प्रवाशांना बसमधून उतरण्यास सांगितले असता ते वाद घालत असल्याचे वाहक दीपक वैरागे यांनी सांगितले. यामुळे प्रशासनाने गर्दीच्या मार्गावरील प्रमुख स्थानकांवर कोविड पथकाची नेमणूक करण्याची मागणी वाहनांकडून होत आहे.

प्रवाशांकडे युनिव्हर्सल पास मागितला असता तो दाखवण्यासाठी वेळ जातो. यामुळे गर्दीच्या वेळेत सर्वांचे पास तपासणे शक्य होत नाही.
-दीपक गायकवाड, वाहक, पीएमपी

सर्वच ठिकाणी प्रवासादरम्यान सरकारने युनिव्हर्सल पास, मास्क वापरणे बंधनकारक केले असून प्रवाशांनी वाहकांना सहकार्य करावे. गर्दीच्या मार्गांवर प्रमुख स्थानकावर कोविड पथकांची नेमणूक होणे आवश्यक आहे.
- संतोष शिंदे, राष्ट्रवादी कामगार युनियन
------------------