पिंपरी, ता. १३ ः शहरात कोरोना प्रादुर्भावाच्या पार्श्वभूमीवर १५ ते १८ वयोगटातील मुलांसाठी लसीकरण केंद्रांची संख्या वाढवावी. तसेच, शाळा- महाविद्यालयांमध्ये फिरते लसीकरण केंद्र सुविधा उपलब्ध करुन द्यावी, अशी सूचना आमदार महेश लांडगे यांनी केली आहे. याबाबत आयुक्त राजेश पाटील यांना निवेदन दिले आहे.

त्यामध्ये म्हटले आहे, सद्यस्थितीला महापालिकेच्या आठ क्षेत्रीय कार्यालयांत केवळ लसीकरण केंद्र सुरू आहेत. एका केंद्रावर दररोज ५०० डोस उपलब्ध होत आहेत. त्यामुळे संपूर्ण शहरात नियमित केंद्र सुरू राहीले तर दररोज केवळ ४ हजार मुलांना लसीकरण केले जाते. त्यामुळे लसीकरण केंद्रांची संख्या वाढवणे क्रमप्राप्त आहे. कोविड बाधित रुग्णांमध्ये लहान मुलांचे प्रमाणही लक्षणीय आहे. ही बाब लक्षात घेता केंद्रांची संख्या आणि लसीची उपलब्धता वाढवावी. तसेच पालक आणि मुलांच्या सोयीसाठी शाळा-महाविद्यालयांमध्ये फिरते लसीकरण सुविधा सुरू करावी.