पिंपरी, ता. १४ ः रॅंडम तपासणीत कोरोना पॉझिटिव्ह आढळलेल्या २९ जणांना ओमिक्रॉन संसर्ग झाल्याचे आढळून आले. त्यांचा ओमिक्रॉन तपासणी अहवाल राष्ट्रीय विषाणू संस्थेकडून शुक्रवारी प्राप्त झाला. मात्र, त्यातील २६ जणांचा दहा दिवसांच्या उपचारानंतरचा तपासणी अहवाल निगेटिव्ह आला आहे. त्यामुळे त्यांना घरी सोडून गृहविलगीकरणात ठेवले आहे. आतापर्यंत ओमिक्रॉन संसर्ग झालेल्यांची संख्या ९३ झाली आहे. त्यातील ८५ जण बरे झाले आहेत. दरम्यान, परदेशातून आलेले व त्यांच्या सपर्कातील १०८ जणांचा कोरोना अहवाल पॉझिटिव्ह आला आहे. त्यातील ९५ जणांचा दहा दिवसांनंतरच्या तपासणीचा अहवाल निगेटिव्ह आल्याने त्यांना घरी सोडले आहे. परदेशातून आलेले व त्यांच्या संपर्कातील एक हजार ९४९ जणांची आजपर्यंत तपासणी केली आहे. त्यातील एक हजार ७६२ जणांचा कोरोना अहवाल निगेटिव्ह आला आहे, असे महापालिका आरोग्य वैद्यकीय विभागाने कळविले आहे.
--