पिंपरी, ता. १४ : पतंगाच्या नायलॉन मांजाने दुचाकीस्वाराचा गळा कापल्याची घटना भोसरी येथे घडली. यामध्ये दुचाकीस्वाराच्या गळ्याला गंभीर दुखापत झाली. कैलास पवार (रा. भोसरी) असे या घटनेत जखमी झालेल्या व्यक्तीचे नाव आहे. पवार हे शुक्रवारी (ता.१४) सायंकाळी पावणेसहाच्या सुमारास दुचाकीवरून भोसरीतील लांडेवाडी येथून जात असताना अचानक गळ्याला काही अडकल्यासारखे वाटले. गळ्याला हात लावला असता रक्त दिसले. दुचाकी बाजूला घेऊन पहिले असता गळ्यात मांजा अडकल्याचे स्पष्ट झाले. या घटनेत पवार यांच्या गळ्याला दुखापत झाली. तातडीने त्यांच्यावर रुग्णालयात उपचार करण्यात आले. दरम्यान, नायलॉन मांजावर बंदी असतानाही काही दुकानामध्ये नायलॉन मांजाची विक्री होत असल्याचे दिसून येते. यापूर्वीही अशा घटना घडल्या आहेत.