पिंपरी, ता. २४ : चिंचवड येथील कमला शिक्षण संकुलाचे संस्थापक सचिव डॉ. दीपक शहा यांच्या मार्गदर्शनाखाली प्रतिभा महाविद्यालयातील प्राध्यापकांनी पी. एच.डी. प्राप्त केल्याप्रित्यर्थ सत्कार समारंभ व पुस्तक दिनाचे आयोजन करण्यात आले होते. यावेळी प्राचार्य डॉ. बाबासाहेब सांगळे, डॉ. पोर्णिमा कदम, उपप्राचार्या डॉ. क्षितीजा गांधी, डॉ. वनिता कुऱ्हाडे, मुख्य प्रशासकीय अधिकारी डॉ. राजेंद्र कांकरिया आदी उपस्थित होते.

शहा म्हणाले, ‘‘विद्यार्थ्यांना येणाऱ्या अडचणी समजावून घेत त्याचे योग्य निराकरणही वेळच्या वेळी प्राध्यापकांकडून झाले पाहिजे. कोरोना प्रादुर्भाव काळात विद्यार्थ्यांना ऑनलाइन परीक्षा द्याव्या लागल्या. अनेक विद्यार्थी ग्रंथालयापासून दुरावले होते. अनेक उत्तमोत्तम लेखकांचे पुस्तके उपलब्ध असून त्याचे वाचन विद्यार्थ्यांनी केले पाहिजे.’’

आजच्या जागतिक पुस्तक दिनाचे औचित्य साधून विविध शाखेतील विद्यार्थ्यांनी ग्रंथालयातील पुस्तके वाचली. त्याचे नियोजन विभाग प्रमुख डॉ. अनामिका घोष, प्रा. अनिता विश्वकर्मा यांनी केले. मुख्य व सहायक ग्रंथपाल मीना डोंगरे, संयुक्ता बोरसे, सचिन गायकवाड, दीपक सोनावणे, सीमा इंगळे, मदतनीस रवींद्र नलावडे, विमल आलटे यांनी विशेष परिश्रम घेतले.