ऊर्से, ता. १६ : पवन मावळातील अनेक गावांत गुरुवारी (ता.१६) सायंकाळी साडेपाच वाजता वादळी वारे, विजेच्या गडगडाटासह पावसाने सुमारे एक तास जोरदार हजेरी लावली. त्यामुळे उतरणीसाठी आलेला आंबा मोठ्या प्रमाणावर खाली पडला. उन्हाळी मका, बाजरी, ज्वारी या पिकांचे मोठे नुकसान झाले आहे. 
या वादळी पावसामुळे अनेक जणांच्या घरात पाणी शिरले. तर अनेकांनी बाहेर ठेवलेले धान्य, कांदा, बाजरी पावसाने भिजल्याने ग्रामस्थांची चांगलीच धावपळ उडाली. झाडावरील काढणीला आलेले आंबे खाली पडल्याने शेतकऱ्यांचे नुकसान झाले. रस्त्यावर सगळीकडे पाणीच पाणी झाले. या पावसामुळे वातावरणात प्रचंड गारवा निर्माण झाला. शेतातील भात खाचरे पाण्याने तुडुंब भरली. तर काही ठिकाणी बांध फुटले. ओढ्याला मोठ्या प्रमाणावर पाणी आले. वादळी वाऱ्याने शेतातील अनेक झाडे कोसळली. सुदैवाने यामध्ये कुठलीही जीवितहानी झाली नाही.

BBD24B02930,31,32