ऊर्से, ता. २५ ः मावळ तालुक्यात सुमारे ९० टक्के भात लागवड पूर्ण झाली असून, १ ते १५ ऑगस्ट या कालावधीत ई-पीक पाहणी पूर्ण करण्याचे आवाहन तालुका कृषी अधिकारी मारुती साळे यांनी शेतकऱ्यांना केले आहे. या वर्षीपासून शासकीय योजनांचा लाभ घेण्यासाठी ई-पीक पाहणी अनिवार्य करण्यात आली आहे. त्यामुळे ई-पीक पाहणी न केल्यास शेतकऱ्यांना कोणताही शासकीय लाभ मिळणार नाही.

शेतकऱ्यांमध्ये माहितीचा अभाव
तालुक्यात भात लागवडीचे काम अंतिम टप्प्यात असून, उर्वरित लागवड लवकरच पूर्ण होणार आहे. मात्र, ई-पीक पाहणीबाबत अद्याप अनेक शेतकऱ्यांमध्ये माहितीचा अभाव व उदासीनता दिसून येत आहे. ई-पीक पाहणीचे महत्त्व लक्षात घेता शेतीतील फायदे, अनुदान आणि विमा योजनांसाठी ही प्रक्रिया अत्यावश्यक असल्याचे कृषी अधिकाऱ्यांनी सांगितले आहे.

यावर्षी नवीन काय?
या वर्षीपासून डिसीएस नावाचे नवीन अ‍ॅप्लिकेशन वापरण्यात येणार आहे. त्यामुळे पूर्वीचे जुने अ‍ॅप डिलीट करा आणि १ ऑगस्ट रोजी नवीन अ‍ॅप डाऊनलोड करूनच ई-पीक पाहणी करा. ज्यांच्याकडे स्मार्टफोन नाही, त्यांनी सेवा केंद्र किंवा गावातील डिजिटल सेवा उपलब्ध असलेल्या ठिकाणी जाऊन ई-पीक पाहणी पूर्ण करावी.

पाहणी केल्यानंतर काय करावे?
डिजिटल पुरावा ठेवून वेळोवेळी अपडेट मिळवण्यासाठी जिल्हा कृषी विभागाशी संपर्कात राहावे.

ई-पीक पाहणी न केल्यास होणारे तोटे
- शासकीय अनुदान बंद होईल
- नुकसानभरपाई मिळणार नाही
- पीक विमा योजनेचा लाभ मिळणार नाही
- भावांतर योजनेस अपात्र ठराल
- इतर शेतकरी कल्याण योजना बंद होतील
ई-पीक पाहणीचा डेटा आता फार्मर आयडीसोबत लिंक केला जात आहे. त्यामुळे ही प्रक्रिया पूर्ण न केल्यास कोणतीही योजना लागू होणार नाही.

ई-पीक पाहणी केल्याचे फायदे
- शासकीय योजना व अनुदानासाठी पात्रता
- खरीप हंगामातील पीक विम्याचा लाभ
- नैसर्गिक आपत्तीमुळे होणाऱ्या नुकसानाची भरपाई
- डिजिटल डेटा ट्रॅकिंगसाठी उपयोग
- भविष्यातील शेती धोरणासाठी महत्त्वाचा आधार
---