ऊर्से, ता. २६ : केंद्र वारू, चावसर आणि शिळिंब या तीन केंद्रांतील शिक्षकांची संयुक्त केंद्रस्तरीय शिक्षण परिषद वारू येथे उत्साहात पार पडली. या परिषदेचा उद्देश निपुण भारत अभियानाअंतर्गत विविध उपक्रम व शैक्षणिक कार्यपद्धतींबाबत सखोल विचारविनिमय व मार्गदर्शन करणे हा होता. कार्यक्रमाचे प्रमुख विस्तार अधिकारी संदीप काळे होते. केंद्रप्रमुख सुनंदा दहीदुले, केंद्रस्तरीय शिक्षण परिषद विषय सुलभक म्हणून नेहा कुलकर्णी, सुनिता देशमुख, राहुल वाकचौरे आणि संजय ठाकरे यांनी विविध विषयांवर मार्गदर्शन केले.
केंद्रस्तरीय शिक्षण परिषदेत तीन शाळांमधील एकूण २८ शिक्षक उपस्थित होते. परिषदेत निपुण महाराष्ट्र मिशन अंतर्गत शैक्षणिक धोरणे, उद्दिष्टे व प्रशासनाच्या भूमिकेबाबत अत्यंत सखोल व समर्पक मार्गदर्शन करण्यात आले. उपस्थित शिक्षकांना प्रेरणादायी प्रास्ताविकात शिक्षकांच्या जबाबदाऱ्या, शाळेतील गुणवत्ता वाढीबाबत मौलिक विचार, विषयतज्ज्ञांनी निपुण भारत कृती आराखडा, मूल्यांकन प्रक्रिया, वाचन-लेखन व गणितातील निपुणतेसाठी आवश्यक बाबी (शैक्षणिक साधने) यांचा प्रभावी उपयोग याबाबत मार्गदर्शन केले. ही परिषद माहितीपूर्ण, प्रेरणादायी आणि स्नेहपूर्ण वातावरणात पार पडली. सहभागी शिक्षकांनी एकमेकांशी अनुभवांची देवाणघेवाण करत नवे विचार घेतले आणि निपुणतेच्या दिशेने सामूहिक वाटचालीचा संकल्प केला. ही परिषद शिक्षण, संवाद व सहकार्याच्या उत्कृष्ट पातळीवर ठरली. नितीन वाघमारे यांनी सूत्रसंचालन केले तर संजय ठाकर यांनी आभार मानले.