ऊर्से, ता. २९ : दिवड गाव हे मावळातील शेवटचे गाव म्हणून ओळखले जाते. पावसामुळे या गावातील निसर्ग सौंदर्य खुलून दिसू लागल्याने, पर्यटकांची या भागात रेलचेल वाढली आहे.
मागील तीन महिन्यापासून मावळात जोरदार पडणाऱ्या पावसामुळे येथील नैसर्गिक सौंदर्यात भर पडली आहे. झाडे, झुडपे, गवत, पिके यामुळे डोंगर भाग हिरवागार झाला आहे. पुण्यापासून चाळीस किलोमीटरवर अंतरावर डोंगरपायथ्याशी हे गाव वसलेले आहे. येथील भात हे मुख्य पीक असल्याने भाताचे शिवार देखील खुलले आहे. डोंगरपायथा असल्याने येथील हिरवेगार निसर्ग, पर्यटक प्रेमींना आकर्षित करत आहे. नदी, नाले, झरे, ओढे ओसंडून वाहत आहेत. अधून मधून पडणारे ऊन, ढगाळ वातावरण, हवेतील गारवा, रोज बदलणारे हवामान यामुळे गाव पर्यटकांचे हिल स्टेशन होत आहे. पुणे व पिंपरी-चिंचवड भागातून निसर्ग प्रेमी दुचाकी वरून या ठिकाणी येत आहेत.