भोसरी, ता. १८ ः महाकवी वामनदादा कर्डक यांच्या जयंतीनिमित्त स्वरांजली कला-क्रीडा मंचद्वारे या वर्षीचा समाजभूषण पुरस्कार सामाजिक कार्यकर्ते मारुती भापकर यांना जाहीर झाला आहे. तर, डॉ. अशोक शीलवंत यांना मरणोत्तर धम्मभूषण पुरस्कार जाहीर झाला आहे. रविवारी (ता. २०) भोसरीतील कै. अंकुशराव लांडगे नाट्यगृहात सायंकाळी पाच वाजता रिपब्लिकन सेनेचे सरसेनानी आनंदराज आंबेडकर यांच्या हस्ते हा पुरस्कार दिला जाणार आहे. नांदेडमधील ललकार बाबू आणि मुंबईतील चंद्रभागा गायकवाड यांना महाकवी वामनदादा कर्डक जीवन गौरव पुरस्कार देण्यात येणार आहे. पुणे-पिंपरी-चिंचवड शहरातील गायक संतोष गायकवाड, धम्मपाल सावंत, विशाखा नगराळे, अनिरुद्ध सूर्यवंशी, स्नेहल वानखडे, अशोक गायकवाड, सार्थक शिंदे यांना उत्कृष्ट गायक पुरस्काराने सन्मानित केले जाणार आहे. या वेळी वामनदादा कर्डक रचित गीतांच्या गायनांचाही कार्यक्रम होणार आहे.