भोसरी, ता. १ ः गवळीनगरमधील सांडपाणी वाहिनी वारंवार तुंबून चेंबरमधून रस्त्यावर दुर्गंधीयुक्त पाणी वाहत होते. यामुळे परिसरातील नागरिक त्रस्त झाले होते. या समस्येची बातमी ‘सकाळ’मध्ये प्रसिद्ध झाल्यावर पिंपरी-चिंचवड महापालिकेने सांडपाणी वाहिनीच्या तुंबलेल्या चेंबरची दुरुस्ती केल्याने नागरिकांनी समाधान व्यक्त केले.
गवळीनगरमध्ये सुमारे पन्नास कुटुंबांच्या घरासमोरून दुर्गंधीयुक्त पाणी वाहत होते. त्यामुळे येथील नागरिकांचे घरात बसणे अवघड झाले होते. नागरिकांच्या आरोग्याचाही प्रश्न निर्माण झाला होता. एक महिन्यांपासून सांडपाणी वाहिनी तुंबण्याचा प्रकार सुरू होता. दुर्गंधीयुक्त पाण्यामुळे येथील नागरिक आजारी पडण्याच्या घटनेतही वाढ झाली होती. महापालिकेच्या संबंधित अधिकारी कर्मचाऱ्यांना येथील नागरिक वारंवार तक्रार करत होते. ‘सकाळ’मध्ये या विषयाची बातमी प्रसिद्ध झाल्यावर महापालिकेने तातडीने येथील सांडपाणी वाहिनीच्या तुंबलेल्या चेंबरची दुरुस्ती केली. त्यामुळे नागरिकांनी समाधान व्यक्त केले आहे.