भोसरी, ता. २९ ः पहडी, छेरा पहडी, भजन - कीर्तन, महाप्रसाद आदी विविध कार्यक्रमांनी श्री जगन्नाथ महाराज रथयात्रा समारंभ ओडिया बांधवांनी मोठ्या भक्तिभावाने साजरा केला. भोसरी परिसरातून पारंपरिक वाद्यांच्या गजरात श्री जगन्नाथ महाराज यांच्या रथाची वाजत गाजत मिरवणूक काढण्यात आली. रथयात्रेचे भाविकांनी जागोजागी दर्शन घेतले.
भोसरीतील आळंदी रस्त्यावरील जगन्नाथ मंदिरापासून रथयात्रेला सुरुवात करण्यात आली. आमदार महेश लांडगे, माजी नगरसेविका अनुराधा गोफणे, सोनाली गव्हाणे, सचिन लांडगे, उमेश लोढे, कविता भोंगाळे आदींसह नागरिक मोठ्या प्रमाणात सहभागी झाले.
आळंदी रस्ता, शास्त्री चौक, पीएमटी चौक, चांदणी चौक, पीसीएमसी चौक, संत ज्ञानेश्वर भाजी मंडई रस्ता आदी मार्गाने ही मिरवणूक काढण्यात आली. भोसरी गावठाणातील महेशदादा स्पोर्टस फाउंडेशन येथे तिचा समारोप झाला. भाविकांना महाप्रसादाचे वाटप करण्यात आले. रात्री आठ वाजता श्री जगन्नाथ महाराज यांची ५६ भोग आरती करण्यात आली.
श्री जगन्नाथ सेवा चॅरिटेबल ट्रस्ट, प्रवासी ओडिया भक्त समाज आदींनी कार्यक्रमांचे आयोजन केले. ट्रस्टचे विश्वस्त प्रदीप स्वाईन, इंद्रमणी स्वाईन, निरंजन प्रधान, अक्षय राऊत, शिवराम बल, राजकिशोर स्वाईन, अभिमन्यू स्वाईन, रिकू जाना, सुशांत बल, उदय परिडा, अभिमन्यू राऊत आदींसह सर्व विश्वस्त मंडळांनी परिश्रम घेतले.
श्री जगन्नाथ महाराज यांची रथयात्रा ५ जुलैला परतीच्या प्रवासाकडे निघणार आहे. रथयात्रेचा परतीचा प्रवास महेशदादा स्पोर्ट्स फाउंडेशन ते आळंदी रस्त्यावरील श्री जगन्नाथ मंदिर असा होणार आहे.

इस्कॉनकडून आज रथयात्रा
रावेत ः इस्कॉन मंदिराच्यावतीने देखील श्री जगन्नाथ रथयात्रा काढली जाणार आहे. उद्या रविवारी (ता. २९) ही रथयात्रा निघणार आहे. आकुर्डी येथील श्री विठ्ठल मंदिर येथून महाआरती झाल्यानंतर ठिक ३.३० वाजता यात्रेला सुरुवात होणार आहे. म्हाळसाकांत चौक, छत्रपती संभाजी महाराज चौक, बिजलीनगर पूल, धर्मराज चौक व शेवटी रावेतच्या इस्कॉन मंदिर येथे रथयात्रेचा समारोप होईल.

BHS25B03054