भोसरी, ता. ५ ः विविध भागांतील काही रस्त्यांवर पावसामुळे खड्डे पडल्याने वाहन चालक आणि नागरिकांनी संताप व्यक्त केला आहे. रस्त्यांवरील खड्डे तातडीने बुजविण्याची मागणी होत आहे.
पिंपरी चिंचवड महापालिकेद्वारे भोसरीतील बालाजीनगरमध्ये मे महिन्यात सांडपाणी वाहिनीच्या कामासाठी बुद्धविहारसमोरील रस्ता खोदण्यात आला होता. त्याचप्रमाणे भोसरीतील गवळीनगरमधील रस्ताही एक वर्षापूर्वी सांडपाणी वाहिनी टाकण्यासाठी खोदण्यात आला होता. मात्र या खड्ड्यांचे महापालिकेकडून वेळीच डांबरीकरण झाले नाही. त्याचप्रमाणे खोदकामामुळे झालेली चरही व्यवस्थित भरली गेली नसल्याने पावसामुळे रस्त्यावर जागोजागी खड्डे पडले आहेत. त्याचप्रमाणे भोसरीतील दिघी रस्त्यावरील गंगोत्री पार्कमधील बॅडमिंटन हॉलच्या पाठीमागील रस्त्यावरही पावसामुळे जागोजागी खड्डे पडले आहेत. अत्यंत वर्दळीच्या असलेल्या या अंतर्गत रस्त्यावरील खड्ड्यांत पडून वाहन चालक जखमी होत आहेत.
बालाजीनगरमधील सामाजिक कार्यकर्ते प्रा. बी. बी. शिंदे म्हणाले, ‘‘बालाजीनगरमधील रस्त्यावर खड्डे पडल्याने शाळेत जाणारी लहान मुले, स्त्रिया घसरून पडत आहेत. मे महिन्यात काम केलेले असतानाही महापालिकेने या रस्त्याचे डांबरीकरण न केल्यामुळे अशी परिस्थिती उद्भवली आहे. या विषयी महापालिकेकडे पाठपुरावा करूनही काही उपयोग होत नाही.’’