भोसरी, ता. ७ ः इंद्रायणीनगरातील श्री तिरुपती बालाजी चौकामध्ये संध्याकाळच्या वेळेस पुणे - नाशिक महामार्गावरून खासगी बस आणि जड वाहने येत असल्याने वाहतूक कोंडी होत आहे. चौक परिसरात अनधिकृतपणे बसत असलेले विविध वस्तू विक्रेत्यांमुळे त्यात आणखी भर पडत आहे. ही समस्या तातडीने सोडविण्याची मागणी वाहनचालक, दुकानदार आणि नागरिक यांच्यामधून होत आहे.
भोसरीतील इंद्रायणीनगरातील श्री तिरुपती बालाजी चौकातून नागरिक स्पाइन रस्ता, एमआयडीसी, इंद्रायणीनगर, भोसरी आणि शहर परिसरात ये-जा करतात. पूर्वी या चौकातून खासगी बस अथवा अवजड वाहने जात नव्हती. मात्र, दोन वर्षांपूर्वी हा चौक पुणे - नाशिक महामार्गाला जोडण्यात आला. त्यामुळे इंद्रायणीनगरमधील नागरिकांना पुणे - नाशिक महामार्गाने जाण्यासाठी जवळचा रस्ता तयार झाला.

काय आहेत कारणे ?
- स्पाईन रस्त्यावर राजे श्री छत्रपती शिवाजी महाराज चौकातून नाशिक, मोशी, चऱ्होली, आळंदी, पिंपरी-चिंचवड शहर, इंद्रायणीनगरकडे वाहनांची ये-जा
- या चौकात संध्याकाळच्या वेळेस वाहनांची प्रचंड गर्दी
- नाशिककडील खासगी प्रवासी बस श्री तिरुपती बालाजी चौकात वळून संतनगरमधील आरटीओ कार्यालयमार्गे मोशीकडे
- भोसरी एमआयडीसीकडे जाणाऱ्या जड वाहनांकडूनही चौकाचा वापर
- पदपथावरही विविध वस्तू विक्रेत्यांचे अतिक्रमण

काय करायला हवे ?
- चौकातील अतिक्रमणांवर कारवाई करणे.
- पदपथ पादचाऱ्यांसाठी मोकळा करणे.
- चौकात उंचीरोधक लोखंडी कमान लावणे
- रस्त्याच्याकडेला एकच मार्गिकेमध्ये वाहने उभी करणे

इंद्रायणीनगरातील श्री तिरुपती बालाजी चौकात अनधिकृतपणे अतिक्रमण करणाऱ्या विविध विक्रेत्यांवर कारवाई करण्यात येईल. त्याचप्रमाणे पदपथही पादचाऱ्यांसाठी मोकळा करण्यात येईल. तेथे कारवाई करण्याच्या सूचना संबंधित अधिकाऱ्यांना दिल्या जाणार आहेत.
- अजिंक्य येळे, ‘क’ प्रभाग क्षेत्रीय अधिकारी

पुणे - नाशिक महामार्गावरून अवजड वाहने आणि खासगी प्रवासी बस यांना इंद्रायणीनगरातील श्री तिरुपती बालाजी चौकामार्गे जाण्यास बंदी घालण्यात येणार आहे. ही वाहने त्या रस्त्याने जाऊ नयेत, यासाठी उंचीरोधक लोखंडी कमान लावण्यात येईल.
- दीपक साळुंके, वरिष्ठ पोलिस निरीक्षक, भोसरी पोलिस वाहतूक विभाग