भोसरी, ता. ८ : शांतीनगरमधील कॉलनी क्रमांक एक समोरील गटाराचे चेंबर वारंवार तुंबल्याने गटाराचे दुर्गंधीयुक्त पाणी रस्त्यावरून वाहत आहे. त्यामुळे वाहनचालक आणि नागरिकांना त्रास होत आहे.
या ठिकाणी गटाराचे चेंबर तुंबण्याचा प्रकार वारंवार घडत आहे. ही समस्या गेल्या काही वर्षांपासूनची असतानाही पालिकेने या गटाराच्या दुरुस्तीकडे दुर्लक्ष केले आहे. या रस्त्याचे सिमेंट काँक्रिटीकरणही करण्यात आले आहे. मात्र, गटाराचे काम व्यवस्थित न केल्यामुळे चेंबर तुंबत असल्याच्या तक्रारी नागरिकांनी केल्या आहेत. भोसरी एमआयडीसी, टेल्को रस्ता, पिंपरी, चिंचवड, निगडीला जोडणारा हा जवळचा रस्ता असल्याने येथे वाहनांची गर्दी असते. वाहनांमुळे गटाराचे पाणी दुचाकी चालक, पादचारी आणि कामगारांच्या अंगावर उडत असल्याने येथे वादावादीचे प्रसंगही घडत आहेत. त्यामुळे या चेंबरच्या दुरुस्तीची मागणी नागरिकांनी केली आहे.