चिंचवड स्टेशन, ता. ६ : मोहननगर चिंचवड येथील राज्य कामगार विमा योजना (ईएसआय) रुग्णालयातील सोनोग्राफी सुविधा मागील दहा वर्षांपासून बंद आहे. पण, आठवडाभरात नवी यंत्रणा सुरू करण्यात येणार असल्याचा दावा प्रशासनाने केला आहे. त्यामुळे कामगार आणि त्यांच्या नातेवाइकांसाठी सुविधा उपलब्ध होण्याची अपेक्षा निर्माण झाली आहे.

या ‘ईएसआय’ रुग्णालयात रोज ६०० ते ६५० रुग्ण आरोग्य तपासणीसाठी येतात. सोमवार आणि गुरुवारी ही संख्या सरासरी ८५० असते. या रुग्णालयात १०० खाटांची सुविधा आहे. गरजूं रुग्णांना सोनोग्राफीसाठी ‘ईएसआय’ने करार केलेल्या तपासणी केंद्रात जावे लागत आहे. त्यामुळे वेळ वाया जाण्यासह जादा पैसे मोजावे लागत आहेत. त्यावर वैद्यकीय अधीक्षक डॉ. वर्षा सुपे यांनी अनेक दिवस पाठपुरावा करून ही सोनोग्राफी यंत्रणा आणण्यात यश मिळविले आहे. पिंपरी चिंचवड महानगरपालिकेच्या वतीने भाडेतत्त्वावर ही सुविधा उपलब्ध करण्यात आली आहे. मागील काही दिवसांपूर्वीच या रुग्णालयात मानसोपचार तज्ज्ञ तसेच त्वचारोग तज्ज्ञ नव्याने रुजू झाले आहेत. क्षयरोगासारख्या आजाराचे अचूक निदान करणारी ‘सीबी-नॅट’ ही यंत्रणादेखील रुग्णालयात बसविण्यात आली आहे. ही मशीन वापरण्याचे खास प्रशिक्षण घेतलेले तंत्रज्ञ लवकरच रुग्णसेवेत उपलब्ध होतील, असे डॉ. सुपे यांनी सांगितले.