चिंचवड, ता.२५ ः चिंचवडगावातील महापालिकेच्या मोरया गोसावी क्रीडा संकुल परिसरात काही महिन्यांपूर्वीच नूतनीकरण करण्यात आलेले सार्वजनिक सुलभ स्वच्छतागृह अल्पावधीतच अतिशय खराब झाली आहेत. त्यामुळे त्याबाबत नागरिकांच्या तक्रारी येत आहेत.
मोरया गोसावी क्रीडा संकुलाच्या मैदानावर दररोज सकाळ-संध्याकाळ विविध खेळाडू सरावासाठी तर नागरिक फेरफटका मारण्यासाठी येत असतात. त्यांच्या सोयीसाठी काही महिन्यांपूर्वी महापालिकेकडून सुलभ स्वच्छतागृहांचे नूतनीकरण करण्यात आले होते. मात्र अल्पावधीतच कमोड खराब, फ्लश बॉक्स तुटलेले असल्याने त्याचा वापर करण्यात नागरिकांना मोठी अडचण होत आहे.
स्थानिक रहिवासी मंगला डोळे - सपकाळे म्हणाल्या,‘‘केशवनगर परिसरात कुठेही स्वच्छतागृह नाही. फक्त मोरया गोसावी क्रीडा संकुल येथेच आहे. परंतु अनेकदा तेथील नळ तर कधी फ्लॅश खराब असतो. कधी एक्झॉस्ट पंखा तुटलेला दिसून येतो. प्रशासन मोठा खर्च करून हे सर्व करतात; पण त्या वस्तूंची गुणवत्ता अत्यंत हलकी असते. त्यामुळे असे प्रकार होतात. प्रशासनाने त्याकडे लक्ष दिले पाहिजे.’’
ब क्षेत्रीय अधिकारी किरणकुमार मोरे म्हणाले,‘‘मोरया गोसावी क्रीडा संकुल परिसरातील स्वच्छतागृहाच्या कामाची माहिती कार्यकारी अभियंता (स्थापत्य) यांच्याकडून घेण्याचे काम चालू आहे. ती माहिती घेतल्यानंतर त्यावर बोलता येईल.’’