चिंचवड, ता. ८ ः आषाढी एकादशीनिमित्त विवेकानंद संस्कार केंद्र कन्याकुमारी शाखा पिंपरी-चिंचवड यांच्या वतीने शहरातील विविध सोसायट्यांमध्ये पारंपरिक पद्धतीने पालखी सोहळ्याचे आयोजन करण्यात आले होते. इव्हाना सोसायटी वाकड, यशोमंगल सोसायटी लिंक रोड चिंचवड, एसकेएफ सोसायटी चिंचवड, नक्षत्रम सोसायटी चिंचवड, डिवाइन डॅझल सोसायटी रहाटणी, नम्रता क्रिस्टल सोसायटी रहाटणी आणि कासा-सेव्हन सोसायटी थेरगाव येथे संस्कार वर्गाच्या माध्यमातून पालखी सोहळ्याचा उपक्रम राबविण्यात आला.
या उपक्रमात पाचशेहून अधिक मुले, युवा आणि पालक पारंपरिक वेषभूषेत सहभागी झाले होते. केंद्राचे हे संस्कार, योग व स्वाध्याय वर्ग पूर्णपणे विनामूल्य असून, समाजातील सर्व स्तरातील नागरिकांच्या सहकार्याने हे उपक्रम यशस्वीपणे राबवले जातात. विवेकानंद केंद्र लहान मुले, युवक, गृहस्थ व ज्येष्ठांसाठी विविध सामाजिक व सांस्कृतिक उपक्रम राबवते.
आयोजनात नगरप्रमुख पुंडलिक मते, चिंचवडचे नगर प्रमुख शशिकांत सुतार, श्रीनिवास उंडे, अविनाश गोखले, लीना लढे, अस्मिता करमरकर, रेखा तरोडे, जयदेव म्हमाणे, अविनाश त्रिवेदी, चैतन कानडे, पवन काकी, आशा शिर्के आदींचा सक्रिय सहभाग होता.