चिंचवड, ता. १५ : पिंपरी चिंचवड महानगरपालिकेच्या ‘ब’ क्षेत्रीय कार्यालयाच्या अंतर्गत येणाऱ्या परिसरात आरोग्य विभागाने मोठ्या प्रमाणात कारवाई करत तब्बल १ लाख २७ हजार ३०० रुपयांचा दंड वसूल केला. डासांची उत्पत्ती, प्रतिबंधित प्लास्टिकचा वापर आणि रस्त्यावर कचरा व राडारोडा टाकणे याविरोधात ही कारवाई करण्यात आली.
महापालिकेचे उपआयुक्त सचिन पवार, क्षेत्रीय अधिकारी किरणकुमार मोरे व सहाय्यक आरोग्य अधिकारी सुधीर वाघमारे यांच्या मार्गदर्शनाखाली पार पडली. आरोग्य निरीक्षक मुकेश जगताप, रूपाली साळवे, आरोग्य सहाय्यक सागर सणस आणि रोहन डामसे यांच्या पथकाने ही कारवाई केली.
या कारवाईत एका आठवड्यामध्ये डासांचे उत्पत्ती स्थळ असलेल्या ठिकाणी १ लाख ११ हजार रुपये, प्रतिबंधित प्लास्टिक वापरल्यामुळे १० हजार आणि रस्त्यावर कचरा, राडारोडा टाकल्यामुळे ६ हजार ३०० रुपयांचा दंड आकारण्यात आला. याशिवाय, दळवीनगर, पांढरकरनगर, इंदिरानगर येथील कचरा टाकण्याच्या ठिकाणी भित्तीचित्रांच्या माध्यमातून तसेच पेव्हिंग ब्लॉक बसवून परिसराचे सुशोभीकरण करण्यात आले आहे.