मच्छिंद्रनाथ कदम : सकाळ वृत्तसेवा
चिंचवड, ता. २५ : प्रेमलोक पार्क येथील स्वा. सावरकर उद्यानातील सुविधांबाबत महापालिका प्रशासनाने दुर्लक्ष सुरूच ठेवले आहे. त्यामुळे एकेकाळी टवटवीत आणि प्रसन्न असलेल्या या स्थळाला अवकळा आली आहे. विशेषत: ज्येष्ठ नागरिकांच्या विश्रांतीस्थळी गैरसोयी आहेत. तर, लहान मुलांची खेळणी अजूनही तुटलेल्या स्थितीतच आहेत. त्याच्या दुरुस्तीसाठी अधिकारी कोणाच्या आदेशाची वाट पाहत आहेत, असा प्रश्न नागरिक उपस्थित करत आहेत.

स्वा. सावरकर उद्यानात सुविधांची मोठी दुरवस्था झाली आहे. गेल्या आठ-दहा दिवसांपासून स्वच्छतागृहाला कुलूप लावण्यात आले आहे. येथील पाण्याचा विद्युतपंप नादुरुस्त असल्याचा दावा ठेकेदाराने केला आहे. मोटार बंद असली, तरी पाण्याची टाकी भरून ठेवण्यात आलेली नाही. किंवा पर्यायी पंप ठेवण्यात आलेला नाही. त्यामुळे महिला आणि ज्येष्ठ नागरिकांनाची गैरसोय होत आहे. पाणी ठिकठिकाणी शेवाळ साचले आहे. त्यामुळे प्रसंगी गंभीर अपघात होण्याची भीती आहे. झाडांच्या पडलेल्या फांद्या उचलण्यात आलेल्या नाहीत. तेथे कीटक असण्याची भीती आहे. ‘‘यावर कोणी काही बोलायला गेले तर उद्यानातील कर्मचारी उद्धटपणे उत्तर देतात,’’ अशी तक्रार काही ज्येष्ठांनी केली आहे. प्रशासनाने तातडीने लक्ष देत उद्यानात मूलभूत सुविधा उपलब्ध करून द्याव्यात, अशी मागणी होत आहे.

अर्धवट काँक्रीटीकरण, बंद स्थितीतील शौचालये, त्यातही स्वच्छतेचा अभाव आहे. येथील उंच वाढलेल्या झाडांची छाटणी आवश्यक आहे. आम्हाला पूर्वीसारखे सुंदर व टवटवीत उद्यान हवे आहे. प्रशासनाने याकडे तातडीने लक्ष देण्याची गरज आहे.
- हिंदुराव जाधव, ज्येष्ठ नागरिक

या उद्यानामध्ये आम्ही सर्व ज्येष्ठ नागरिक येतो. परंतु आमच्या बसण्याच्या ठिकाणी बाजूला शेवाळ साठलेले होते. त्यावरून मी घसरलो. तेथील कर्मचाऱ्याला शेवाळ स्वच्छ करण्यास सांगितले असता, ते निघत नसल्याचे सांगण्यात आले. ते पूर्ण घासून काढले पाहिजे.
- शंकर विचारे, स्थानिक रहिवासी

सावरकर उद्यानाचे मागील चार वर्षांच्या कामाचे ऑडिट झाले पाहिजे. एकदा पेव्हिंग ब्लॉक, नंतर त्यावर सिमेंटचा थर आणि आता ते उखडून पुन्हा दुसरा रस्ता केला जात आहे. ठेकेदार अपुरे काम करत आहे. अशा ठेकेदारांना काळ्या यादीत टाकले पाहिजे.
- संदीप शिंदे, स्थानिक रहिवासी

सर्व उद्यान निरीक्षक तसेच इतर कर्मचाऱ्यांची नुकतीच बैठक घेतली. त्यामध्ये सर्वांना स्पष्ट सूचना केल्या आहेत. येत्या तीन-चार दिवसांत सर्व कामे, लहान मुलांची खेळणी, स्वच्छतागृहासंबंधी समस्या सोडवण्यात येतील.
- महेश गारगोटे, उपायुक्त, तथा मुख्य उद्यान अधीक्षक