चिंचवड, ता.२७ ः भावासाठी स्वतःच्या हाताने राखी बनविणाऱ्या अंशतः दृष्टिहीन असलेल्या साक्षी हिने अतिशय सुंदर राख्या तयार केल्या. तिच्या आत्मनिर्भरतेला प्रोत्साहन देण्यासाठी चिंचवड रोटरी क्लब ऑफ वाल्हेकरवाडीच्यावतीने ‘साक्षीची राखी’ या प्रेरणादायी उपक्रमाचे आयोजन करण्यात आले. त्याला परिसरातील महिला आणि नागरिकांकडून उत्स्फूर्त प्रतिसाद मिळाला.
आळंदी येथील जागृती अंध कन्याशाळेत साक्षी महाजन हिचे १० वीपर्यंतचे शिक्षण झाले. त्यानंतर ती सध्या एम.ए शिक्षण घेत आहे. तिची दृष्टी केवळ १० टक्के आहे. दोन वेळा डोळ्यांवर शस्त्रक्रिया करण्यात आली. परंतु दृष्टी काही आली नाही. तिला एका डोळ्याने काहीच दिसत नाही. एका डोळ्याने फक्त १०.% दिसते. तरी देखील ती स्वतःच्या हाताने अतिशय सुंदर राख्या तयार करते. तिच्या आत्मनिर्भरतेला प्रोत्साहन देण्यासाठी रोटरी क्लबने श्री वाल्हेकरवाडी येथे एकदिवसीय राखी विक्री स्टॉलचे आयोजन करण्यात आले. रोटरी डिस्ट्रिक्ट ३१३१ च्या असिस्टंट गव्हर्नर प्रणिती आलूरकर यांच्यासह परिसरातील असंख्य नागरिकांनी साक्षीच्या स्टॉलला भेट दिली. या उपक्रमात गोविंद चित्तोडकर, ज्योती भालके, हर्षदा भूमकर, करुणा चिंचवडे, पूनम चिंचवडे, स्वाती वाल्हेकर, विजया जगदाळे आणि अश्विनी खोले यांचे सहकार्य लाभले.
या उपक्रमाचे आयोजन रोटरी क्लब अध्यक्ष भरत चव्हाण, सचिव वसंत ढवळे, संस्थापक अध्यक्ष प्रदीप वाल्हेकर, प्रकल्प चेअरमन संदीप भालके आणि समन्वयक रेश्मा बोरा यांच्या पुढाकाराने करण्यात आले.

साक्षीने जिद्दी आणि चिकाटीने स्वतःच्या मेहनतीवर विश्वास ठेवत राख्या तयार केल्या. त्या राख्या आमच्या पदाधिकाऱ्यांच्या पाहण्यात आल्या आणि त्यातून या उपक्रमाची सुरुवात झाली. परिसरातील महिलांनी दिलेली साथ आणि प्रोत्साहन आमच्यासाठी अधिक प्रेरणादायी ठरली.
- भरत चव्हाण, अध्यक्ष, रोटरी क्लब ऑफ वाल्हेकरवाडी

मी सुरुवातीला माझ्या भावासाठीच फक्त राख्या बनवायची. ते पाहून रोटरीच्या काही लोकांनी पाहिले. त्यांनी खूप राख्या देशील का ? अशी विचारणा केली. त्यांनी मला ८०० राख्या बनवायला सांगितले. त्या परवा संपल्या देखील. मला मला खूप बरे वाटले. रोटरी क्लबने माझा विश्वास द्विगुणित केला.
- साक्षी महाजन, अंशतः दृष्टिहीन कलाकार

CWD25A01699