चिंचवड, ता. ८ ः आकुर्डी ते चिंचवडगाव रस्त्यावरील आणि भोईरनगर ते दळवीनगर चौकातील खड्डे नागरिक तसेच वाहनचालक यांच्या त्रासाचे कारण ठरत होते. या खड्ड्यांमुळे वाहतुकीला अडथळा निर्माण होत होता तसेच अपघाताची शक्यताही वाढली होती. ‘आकुर्डी-चिंचवडगाव रस्त्यावर खड्डेच खड्डे; भोईरनगर चौकात दुरवस्था हे वृत्त ‘सकाळ’ मध्ये प्रसिद्ध झाल्यावर ‘ब’ क्षेत्रीय कार्यालयाने याची दखल घेत कारवाईला सुरवात केली. संबंधित ठिकाणचे सर्व खड्डे ब्लॉकचा वापर करून भरून रस्ता दुरुस्त करण्यात आला. प्रशासनाने दाखवलेली तत्परता कौतुकास्पद असल्याची प्रतिक्रिया नागरिकांकडून व्यक्त होत आहे. यामुळे वाहतुकीतील अडचणी काही प्रमाणात कमी झाल्याचे नागरिकांनी सांगितले.