चिंचवड, ता. १२ ः चापेकर चौक ते आकुर्डी रस्त्यावरील एस. के. एफ. कंपनीसमोरचा खड्डेमय गतिरोधक दुरुस्त करण्यात आला आहे. गतिरोधकाच्या दोन्ही बाजूंना पडलेले खड्डे व डांबरी पृष्ठभाग तुटल्याने नागरिकांना त्रास होत होता. त्यामुळे अपघाताची शक्यता व्यक्त होत असल्याने स्थानिकांनी सातत्याने तक्रारी नोंदवल्या होत्या.
या मार्गावर वाहनांची सतत वर्दळ असते. खड्ड्यांमुळे वाहनांचा तोल जाणे, दुचाकीस्वार घसरून पडणे, तसेच वाहनांचे नुकसान होणे यासारख्या घटना घडत होत्या. ‘सकाळ’मध्ये याबाबत ‘गतिरोधकच झाला खड्डेमय’ हे वृत्त प्रसिद्ध झाल्यावर महापालिकेच्या स्थापत्य विभागाने दुरुस्तीचे काम हाती घेतले.
गतिरोधकाच्या दोन्ही बाजूंना नव्याने डांबरीकरण करून खड्डे बुजविण्यात आले असून मार्ग आता सुरळीत व सुरक्षित करण्यात आला आहे. त्वरित कारवाई केल्याबद्दल स्थानिक नागरिकांनी समाधान व्यक्त केले आहे.