चिंचवड, ता. १५ ः प्रेमलोक पार्क येथील स्वातंत्र्यवीर सावरकर उद्यानाची दुरवस्था झाली आहे. येथील लहान मुलांची खेळणी तुटलेली आहेत.
ज्येष्ठांना बसण्यासाठी असलेले बाकडे कमी उंचीचे असून त्यांचीही दुर्दशा झाली आहे. गेल्या दीड वर्षांपासून उद्यानात ठिकठिकाणी झाडांच्या झावळ्यांचे ढीग पडून आहेत. त्यामुळे उद्यानात येणाऱ्या नागरिकांसह लहानग्यांचा हिरमोड होत आहे.
उद्यानात लहान मुलांसाठी असणारी खेळणी, अनेक झोके तुटलेल्या अवस्थेत तसेच वरती टांगून ठेवलेले आहेत. खेळताना लहान मुलांना दुखापत होण्याचा धोका निर्माण झाला आहे. त्यामुळे परिसरातील बाळगोपाळ नाराज झाले आहेत. खूप वर्षापूर्वी कार्यरत असलेल्या रेल्वे रुळाचे काही अवशेष गंजलेल्या अवस्थेत तसेच पडून आहेत. ओपन जिमसाठी बसवलेले साहित्य घाईगडबडीने लावले असल्याने त्याचे फाउंडेशन कमकुवत आहे. त्याचे खालचे पेव्हिंग ब्लॉक निघायला सुरुवात झाली आहे. त्यामुळे वापरकर्त्यांच्या सुरक्षिततेचा प्रश्न निर्माण झाला आहे.
उद्यानामध्ये स्वच्छतेच्या दृष्टीनेही परिस्थिती अत्यंत बिकट आहे. पुरुषांच्या स्वच्छतागृहातील युरीन पॉटचे पाइप, वॉश बेसिनचे पाइप व फ्लश बॉक्स तुटलेले असून ठिकठिकाणी नियमित स्वच्छता नसल्याने दुर्गंधी पसरली आहे. या ठिकाणची स्वच्छता नियमित होत नसल्यामुळे तसेच पाणी २४ तास नसल्यामुळे कायम दुर्गंधी असते. त्यामुळे स्वच्छतागृह नागरिकांना वापरणे ही कठीण झाले आहे.
परिसरातील ज्येष्ठ नागरिकांनी अनेक वेळा तक्रारी करूनही कोणतीही ठोस कारवाई झालेली नाही. काही वर्षांपूर्वी सीएसआर फंडातून सॅंडविक कंपनीने उभारलेला वेस्ट वॉटर ट्रीटमेंट प्लांट देखील गेले कित्येक वर्षांपासून बंद आहे. उद्यानामध्ये वापरण्यात येणारे पाणी याच प्लांटवर आधारित होते, मात्र तो बंद असल्याने सध्या कित्येक महिन्यापासून पिण्याचे पाणी संपूर्ण उद्यानाला वापरले जात आहे.

मुलांना आम्ही रोज गार्डनमध्ये खेळण्यासाठी घेऊन येत असतो. परंतु गेले कित्येक महिन्यांपासून या गार्डनमधील अनेक ठिकाणचे झोके तुटलेले आहेत. त्यामुळे लहान मुले नाराज होतात व रडायला लागतात. गेले कित्येक महिन्यांपासून तुटलेली खेळणी दुरुस्त झालेली नाहीत किंवा नवीन देखील आलेली नाहीत. या उद्यानात येणाऱ्या लहान मुलांची संख्या खूप आहे.
-विनय जगताप, स्थानिक रहिवासी

उद्यानामध्ये असणारे बाकडे उंचीला कमी असल्यामुळे ज्येष्ठांना बसायला अडचणीचे ठरत आहे. त्यामधील अनेक बाकडे तुटलेले आहेत. परवाच एक गृहस्थ त्यावरून पडले. त्यामुळे बाकडे बाजूला करून ठेवले आहे.
-जयराज काळे, स्थानिक रहिवासी

स्वातंत्र्यवीर सावरकर उद्यानाबद्दल बाकडे किंवा इतर बाकीची कामे स्थापत्य विभागाअंतर्गत येतात तरी त्या विभागाला कळवले जाईल व उद्यानातील लहान मुलांचे झोके किंवा इतर साहित्याबद्दल निविदा प्रक्रिया चालू आहे. तसेच आयुक्त बदलीनंतर पुन्हा नव्याने निविदा काढावी लागली. त्यामुळे ती प्रक्रिया झाल्यानंतर या संबंधीची सर्व कामे केली जातील.
-महेश गारगोटे, उपायुक्त क्रीडा व उद्यान विभाग, पिंपरी चिंचवड महापालिका