चिंचवड, ता. १४ : चिंचवडगाव ते बिजलीनगर या मुख्य रस्त्यावरील वेताळनगर झोपडपट्टी इमारतीसमोरील सांडपाणी चेंबरचे झाकण तुटलेल्या अवस्थेत असून, मुख्य रस्त्यावरच चेंबर उघडे असल्याने वाहनचालक आणि पादचाऱ्यांच्या सुरक्षिततेचा प्रश्न निर्माण झाला आहे.
या मार्गावर दिवसभर मोठ्या प्रमाणात वाहतूक सुरू असते. विशेषतः दुचाकीस्वार, ज्येष्ठ नागरिक तसेच शालेय विद्यार्थ्यांसाठी हे उघडे चेंबर धोकादायक ठरत आहे. चेंबरभोवती कोणतीही सुरक्षा व्यवस्था अथवा इशारा फलक नसल्यामुळे रात्रीच्या वेळी अपघात होण्याची शक्यता अधिक वाढली आहे. स्थानिक नागरिकांनी संबंधित विभागाने तातडीने दखल घेऊन तुटलेले झाकण बदलून आवश्यक सुरक्षा उपाययोजना कराव्यात, अशी मागणी केली आहे.