देहू, ता.१३ : रयत शिक्षण संस्थेच्या संत जिजाबाई कन्या विद्यालयाने ‘गुरुकुल’ या उपक्रमांतर्गत सहावी ‘अ’ आणि सातवी ‘अ’ च्या विद्यार्थिनींनी गाथा मंदिराला शैक्षणिक क्षेत्रभेट दिली. भेटीचा मुख्य उद्देश विद्यार्थिनींना महाराष्ट्राच्या संत परंपरेची ओळख करून देणे, त्यांचे जीवनकार्य आणि साहित्याची माहिती देणे हा होता.
या शैक्षणिक सहलीचे नियोजन विद्यालयाच्या मुख्याध्यापिका निवेदिता पासलकर आणि पर्यवेक्षिका मनीषा निकम यांच्या मार्गदर्शनाखाली करण्यात आले होते. संदीप चव्हाण आणि गीतांजली बनसोडे यांनी या उपक्रमाचे नियोजन केले. यावेळी विद्यार्थिनींनी मंदिरातील संत तुकाराम महाराजांच्या प्रतिमेचे दर्शन घेतले. मंदिराच्या भिंतींवर कोरलेल्या अभंग आणि गाथांचे निरीक्षण केले. यामुळे त्यांना तुकाराम महाराजांच्या साहित्यकृतींची ओळख झाली.
विद्यार्थिनींनी मंदिराच्या परिसरात उपस्थित भाविक आणि महाराष्ट्रातील विविध भागांतून आलेल्या पर्यटकांशी संवाद साधून सामाजिक जाणीवा दृढ केल्या. भक्तिमय वातावरणात काही विद्यार्थिनींनी अभंग गायन केले, तर काहींनी गणपती स्तोत्र गायन केले.