सिनेअभिनेते मकरंद अनासपुरे यांचे आवाहन;
देहू, ता. ३० : ‘‘प्रत्येक गावात तुकोबा, ज्ञानोबा आणायचे तर गाथा वन, ज्ञानेश्वरी वन प्रत्येक गावात व्हावे,’’ असे आवाहन सिनेअभिनेते मकरंद अनासपुरे यांनी देहू येथे सोमवारी केले.
देहू नगरपंचायत आणि वृक्षदाई प्रतिष्ठान वतीने तीन दिवसीय व्याख्यानमालेचे आयोजन करण्यात आले आहे. त्यावेळी ‘वृक्षारोपण करू, निसर्गाशी नाते जोडू,’ या विषयावर पहिले पुष्प गुंफताना ते बोलत होते. आमदार सुनील शेळके कार्यक्रमाच्या अध्यक्षस्थानी होते. ज्ञानेश्वर महाराज संस्थानचे अध्यक्ष योगी निरंजननाथ, संत तुकाराम महाराज संस्थानचे अध्यक्ष जालिंदर महाराज मोरे, पोपटराव पवार, देहू नगरपंचायतीचे मुख्याधिकारी चेतन कोंडे, वृक्षदाई प्रतिष्ठानचे अध्यक्ष शिवाजी महाराज मोरे, बाळासाहेब काशीद व इतर व्यासपीठावर उपस्थित होते. देहू नगरपंचायत व वृक्षदा प्रतिष्ठानच्या वतीने नाम फाउंडेशनला जगद्‍गुरू श्री संत तुकाराम महाराज वृक्षवल्ली सेवा पुरस्कार देण्यात आला फाउंडेशनच्या वतीने मकरंद अनासपुरे यांनी हा पुरस्कार स्वीकारला
अनासपुरे म्हणाले, ‘‘प्रत्येक व्यक्तीने पुढच्या पिढीचा विचार करावा. विद्यार्थ्यांना एक एक वृक्ष लावण्यास सांगावे. सयाजी शिंदेचे वृक्षावर प्रेम आहे. त्यामुळे जे विदेशी वृक्ष आहेत, ते काढा व त्याच्या बदल्यात आपली झाडे लावा. सध्या बिबटे मानवी वस्तीत येतात, कारण त्यांचे खाणे बंद झालेले आहे. त्यामुळे वृक्ष लागवड केली पाहिजे.’’
आमदार शेळके म्हणाले, ‘‘रोजगार हमी योजनेतून वृक्षारोपण करण्यास प्राधान्य देण्यात येईल. पोपटराव पवार आणि श्री निरंजननाथ यांनीही मनोगत व्यक्त केले.