इंदोरी, ता. ३० ः यंदा समाधानकारक पाऊस झाल्याने इंदोरी व परिसरात भात, सोयाबीन व भुईमूग पिके जोमात आहेत. त्यामुळे, शेतकरी वर्गात आनंदी वातावरण आहे. मात्र, अडीच महिन्याच्या वाणाची सोयाबीन काढणी लांबणीवर पडत असल्याने शेतकऱ्यांचे नुकसानही होत आहे.
इंदोरीसह सुदुंबरे, सुदवडी, जांबवडे, माळवाडी, कोटेश्वरवाडी, सांगुर्डी, कान्हेवाडी (तर्फे चाकण) या गावांमध्ये भात, सोयाबीन व भुईमूग ही प्रमुख खरिपाची पिके आहेत. सध्या भात पिकाच्या ओंब्या बाहेर पडत आहेत. भात भरणी तसेच सोयाबीनच्या साडेतीन महिन्यांच्या वाणाचे सोयाबीन पिकाच्या शेंगा व भुईमूग शेंगांच्या भरणीसाठी हा पाऊस फायदेशीर ठरणार आहे. मात्र, अडीच महिन्याचे वाणाचे सोयाबीन पीक काढणीस आले आहे. पण, पावसामुळे काढणी लांबणीवर पडत असल्याने नुकसान होत आहे, असे शेतकरी सपना चव्हाण व श्रावण शिंदे यांनी सांगितले.
सध्या गळवा कांदा रोप टाकणी सुरू आहे. सुमारे १५-२० दिवसांपूर्वी टाकलेल्या रोपांना या पावसामुळे मर रोगाचा प्रादुर्भाव झाला. आता ही कांदा रोपे सव्वा ते दीड महिन्यात लागवडीस येतील. तोपर्यंत सोयाबीन पीकाची काढणी उरकून त्या क्षेत्राची कांदा लागवडीसाठी मशागत होईल. यावर्षी कांद्याचे भाव टिकून असल्याने इंदोरी व परिसरात कांदा लागवड क्षेत्र वाढण्याची शक्यता असल्याचे शेतकरी दिनेश चव्हाण व संजय भेगडे यांनी सांगितले.

तुरळक क्षेत्रात भात पीक हे करपा रोगाने पिवळे पडले आहे. अन्नद्रव्यांच्या कमतरतेमुळे हे झाले आहे. त्यासाठी खताचा डोस व किटक नाशक फवारणी केल्यास उत्पादनात घट होणार नाही.
- गणेश दाभाडे, इंद्रायणी कृषी सेवा केंद्र