इंदोरी, ता. २२ ः इंदोरी व परिसरातील गावांमध्ये भटक्या कुत्र्यांच्या दहशतीने नागरिकांत भीतीचे वातावरण निर्माण झाले आहे. एकटे दुकटे घराबाहेर पडायला नागरिक घाबरत आहेत.
चाकण-तळेगाव रस्ता, नाणोली रस्ता, जांबवडे रस्ता, सांगुर्डी रस्ता येथे भटक्या कुत्र्यांच्या झुंडी अधिक आढळतात. गावाचा कचरा डेपो परिसर व रस्त्यांवर जागोजागी पडलेल्या कचऱ्याचे ढीग हे त्यांची वास्तव्‍य व भटकण्याची प्रमुख ठिकाणे आहेत. त्यामुळे, परिसरातील रस्त्यांनी नित्यनेमाने फिरायला जाणाऱ्यांनी
फिरणे बंद केले आहे. तर पहाटे काकड आरतीसाठी वाड्या-वस्त्यांवरुन येणाऱ्यांची संख्या घटली आहे.
मागील आठवड्यात पानसरे वस्तीवरील प्रसाद पानसरे यांच्या गोठ्यात बांधलेल्या म्हशीचे पारड्यावर चार ते पाच भटक्या कुत्र्यांनी हल्ला करुन त्याला जखमी केले. एक कानच तोडला. शाळेत जाणाऱ्या मुलांवर ही हल्ल्याचा प्रयत्न झाला आहे. पादचारी व महिला या कुत्र्यांच्या भीतीने एकटे न जाता सोबतीने जातात. बचावासाठी हातात काठी घेण्याच्या सूचना नागरिक एकमेकांना देत आहेत.

भंडारा डोंगराच्या पायथा परिसरात पिंपरी-चिंचवड मनपा हद्दीत पकडलेली भटकी कुत्री गुपचूप आणून सोडली जातात. हीच कुत्री गटागटाने इंदोरी, जांबवडे, सुदवडी, सांगुर्डी, कान्हेवाडी गावांत जाऊन दहशत निर्माण करत आहेत. त्यांचा बंदोबस्त कसा करावा ? असा गंभीर प्रश्न प्रत्येक ग्रामपंचायतीपुढे निर्माण झाला आहे. - बाळकृष्ण पानसरे, माजी उपसरपंच