जाधववाडी, ता. २४ ः येथील वडाची तालीमजवळ पीएमपी बस थांबा आहे. मात्र त्यावर निवारा शेड आणि बस कुठे थांबते याचा फलक नसल्याने प्रवाशांना इकडे तिकडे चौकशी करावी लागत आहे. शिवाय उन्हा-पावसात बसची वाट पाहावी लागत आहे.
वडाची तालीम येथून पिंपरी, चिखली, पुणे स्टेशनसाठी जाणाऱ्या बस थांबत असतात. त्यामुळे बस थांब्यावर विद्यार्थी तसेच अनेक कामगार बससाठी उभे असतात. सकाळच्यावेळेस विद्यार्थी आणि महिलांची संख्या जास्त असते. येथे दिवसभर प्रवाशांची गर्दी असते. परंतु निवारा शेड आणि बसण्याची सुविधा नसल्याने प्रवाशांना त्रास सहन करावा लागतो. लहान मुले आणि ज्येष्ठ नागरिकांचे हाल होतात. त्यामुळे, थांब्यावर निवारा शेड उभारावे अशी मागणी येथील प्रवासी आणि विद्यार्थ्यांनी केली आहे.
विद्यार्थी संकेत आंभुरे म्हणाला,‘‘सकाळी महाविद्यालयात वेळेवर जावे लागते. बस थांब्यावर वेळापत्रक नसल्याने बस कधी याची शाश्वती नसते. त्यामुळे येथे बसचे वेळापत्रक लावावे. बसची वाट बघत पावसात थांबावे लागत असल्याने निवारा शेड बांधावी.’’