जाधववाडी, ता. १७ : संत बसवेश्वर प्रतिष्ठानच्यावतीने, जाधववाडी येथे राज्यमाता गोमाता पूजन आणि राष्ट्रभक्ती संस्करण महाकवीसंमेलनाचे आयोजन करण्यात आले. संमेलनात कवींनी राष्ट्रभक्तीपर विविध कविता सादर केल्या.
संत शिरोमणी सावता महाराज मंदिरामध्ये वरील कार्यक्रम झाला. संत बसवेश्वर प्रतिष्ठानचे अध्यक्ष मानतेश जालिहाळ,
राष्ट्रीय लोकन्यायालयाचे पॅनेल न्यायाधीश रमेश उमरगे यांच्यासह अनेक मान्यवर उपस्थित होते.
जालिहाळ म्हणाले, ‘‘भूमिपूजन, वास्तुशांती, देवाची प्राणप्रतिष्ठापना अशा धार्मिक कार्यक्रमांमध्ये गायींचेही पूजन व्हायला हवे. थेरगाव येथे संत बसवेश्वर प्रतिष्ठानच्यावतीने आजारी, जखमी गायींवर मोफत उपचार केले जातात.’’
उमरगे यांनी लिखित ‘आईच्या मायेचा स्पर्श’ या काव्यसंग्रहाच्या पुस्तकांचे उपस्थितांना मोफत वाटप करण्यात आले. कादंबरी जाधव, किशोर पांचाळ अशा अनेक कवींनी सादर केलेल्या कवितांना उपस्थितांनी चांगली दाद दिली. नितीन चिलवंत यांनी सूत्रसंचालन केले.