देहूरोड, ता. ८ : देहूरोड कॅन्टोन्मेंट बरखास्त करून स्वतंत्र नगरपरिषद निर्माण करावी, ही मागणी मांडण्यासाठी रविवारी (ता.१०) आंदोलन करण्यात येणार आहे. यावेळी शंकर मंदिरासमोर मोर्चादेखील काढण्यात येणार आहे. याबाबतची माहिती देहूरोड शहर कॅन्टोन्मेंट कृती समितीच्या वतीने देण्यात आली.
यामध्ये देहूरोड कॅन्टोन्मेंट तत्काळ बरखास्त करावे, तेथे नगर परिषद घोषित करावी, केंद्र व राज्य सरकारमध्ये समन्वय साधून नगर परिषद स्थापनेची प्रक्रियेची तत्काळ अंमलबजावणी करावी. नगर परिषद स्थापनेनंतर केंद्र सरकारच्या सर्व योजना देहूरोड भागात लागू होतील, नागरी समस्या, रस्ते, पाणी, ड्रेनेज, आरोग्य यावर स्थानिक पातळीवर निर्णय घेता येईल, देहूरोडचा समावेश महानगरपालिकेत करू नये आदी मागण्या आंदोलकांनी मांडल्या आहेत.
या आंदोलनाला देहूरोड कॅन्टोन्मेंट क्षेत्रातील नागरिक, व्यापारी, सामाजिक संस्था, महिला व तरुणांनी मोठ्या संख्येने उपस्थित राहावे, असे आवाहन करण्यात आले आहे.