देहूरोड, ता. ८ : कॅन्टोन्मेंटच्या मामुर्डी परिसरातील शितळानगर रस्त्यालगत असलेल्या उद्यानाला संरक्षक कुंपण नसल्याने तेथे मद्यपींचा वावर वाढला आहे. या उद्यानात नागरिक आपल्या मुलांना घेऊन येत असतात. मात्र मद्यपी, मोकाट जनावरे व भटक्या श्वानांचा वाढता वावर पाहता लहान मुलांच्या सुरक्षेचा प्रश्न निर्माण झाला आहे.
उद्यानात लहान मुलांसाठी झोपाळे, घसरगुंडी यासारखी खेळणी आहेत. पालक सकाळी व संध्याकाळी आपल्या लहान मुलांसह उद्यानात येतात. परंतु रात्रीच्यावेळी मद्यपींची वर्दळ सुरू राहते. त्यांच्याकडून उद्यानात दारूच्या बाटल्या, प्लास्टिक व इतर कचरा टाकला जातो. तसेच मोकाट जनावरे व श्वानांमुळे खेळण्याचा आनंद घेताना अपघाताचा धोका निर्माण झाला आहे, अशी तक्रार नागरिकांनी केली. या उद्यानाला सुरक्षित करण्यासाठी तातडीने संरक्षक कुंपण उभारावे, नियमित पोलिस गस्त घालावी, अशी मागणी परिसरातील नागरिकांनी केली आहे.
‘सकाळ’ने या समस्येची दखल घेतली असून कॅन्टोन्मेंट प्रशासन व देहूरोड पोलिस याकडे लक्ष देऊन आवश्यक ती कारवाई करतील, अशी अपेक्षा मामुर्डी वासियांनी व्यक्त केली आहे.

KIW25B04954