देहूरोड, ता. ५ : गुरुद्वारा श्री गुरुसिंह सभा येथे श्री गुरु नानक देव महाराज यांचा ५५६ वा प्रकाश उत्सव मोठ्या भक्तिभावाने आणि उत्साहात साजरा करण्यात आला. परिसरातील शीख बांधवांनी दर्शनासाठी गर्दी केली.
त्यानिमित्त तीन दिवस विविध धार्मिक कार्यक्रम, कीर्तन, अखंड पाठ, प्रभात फेरी आणि गुरू का लंगरचे आयोजन करण्यात आले. प्रभात फेरीत निशान साहिब चोले दी सेवा मलकीत सिंह गायडू परिवाराने सेवा दिली. अखंड पाठ साहिबची समाप्ती झाली. यात अखंड पाठाची सेवा अनेक परिवारांनी भक्तिभावाने पार पाडली.
कार्यक्रमात ज्ञानी सोहन सिंगजी, ज्ञानी हरभजन सिंगजी (वडगाववाले), रागी जथा प्रीतिंदर सिंगजी, रागी जथा गुरसेवक सिंगजी तसेच भाई मंजीत सिंह राजू यांनी कीर्तन दरबार सादर केला. गुरुद्वारा व्यवस्थापन समितीच्यावतीने अध्यक्ष गुरुमितसिंग रत्तू, उपाध्यक्ष परमजीतसिंग चटवाल, सचिव गुरुचरणसिंग राजू, खजिनदार महेंद्र सिंग यांनी संयोजन केले.
सायंकाळी बालकांचा सांस्कृतिक/कीर्तन कार्यक्रम विशेष आकर्षण ठरला. कार्यक्रमाच्या शेवटी अरदास करून गुरू का लंगरचा भाविकांनी लाभ घेतला.