देहूरोड, ता. २५ : निगडीगाव येथील भक्तिशक्ती परिसरातील श्री खंडोबा प्रतिष्ठाणच्या वतीने श्री खंडोबा मंदिरात बुधवारी चंपाषष्ठी उत्सव साजरा करण्यात येणार आहे. उत्सवानिमित्त दिवसभर विविध धार्मिक कार्यक्रमांचे आयोजन करण्यात आले आहे. सकाळी ५.३० ते ६.३० या वेळेत श्री खंडेरायाचा अभिषेक होईल. दुपारी १ ते २ वाजता सिद्धिविनायक भजनी मंडळाची भजनसेवा होणार आहे. सायंकाळी ४ ते ७ ॐ श्रीनाथ मल्हार यांचा जागरण गोंधळ, तर सायंकाळी ७.१५ वाजता महाआरती होईल. त्यानंतर सायंकाळी ७.३० ते १० या वेळेत महाप्रसादाचे वितरण करण्यात येणार आहे, अशी माहिती आयोजकांनी दिली.
---