किवळे, ता. १० : अहिल्यानगर, शिर्डी येथे झालेल्या विभागीय स्तरावरील क्रिकेट स्पर्धेत पिंपरी चिंचवड एज्युकेशन ट्रस्टच्या (पीसीईटी) रावेत येथील एस. बी. पाटील पब्लिक स्कूलच्या १७ वर्षाखालील मुलींच्या संघाने तृतीय क्रमांक पटकावला. या स्पर्धेत झालेल्या तीन डावांत श्रेया तरस हिने अप्रतिम फलंदाजी व गोलंदाजी करत बहुमोल कामगिरी बजावली.
स्पर्धेतील उत्कृष्ट कामगिरीच्या आधारे पुण्यातील तीन मुलींसह एकूण १६ विद्यार्थिनींची महाराष्ट्राच्या १७ वर्षाखालील मुलींच्या क्रिकेट संघासाठी निवड करण्यात आली आहे. त्यामध्ये एस. बी. पाटील पब्लिक स्कूलची श्रेया हिचाही समावेश असून, ती संघातील सर्वात कमी वयाची (१३ वर्षे ६ महिने) खेळाडू आहे. ती सध्या इयत्ता सातवीमध्ये शिक्षण घेत आहे. आगामी राष्ट्रीय शालेय क्रिकेट स्पर्धेत महाराष्ट्राचे प्रतिनिधित्व करण्याची संधी मिळाली आहे.