किवळे, ता.१३ : शब्दांना भावनांची साथ आणि आठवणींचा गंध लाभला की साहित्यिक सोहळा वेगळ्याच उंचीवर पोहोचतो. कविता तुझ्या माझ्या प्रस्तुत ‘मुक्त कवितेचे व्यासपीठ’ या उपक्रमाच्या चौथे पर्वात रसिकांनी असेच भावुक क्षण अनुभवले.
या सोहळ्यास दिवंगत साहित्यिक सुहास शिरवळकर यांच्या पत्नी सुगंधा शिरवळकर यांची प्रमुख उपस्थिती लाभली. त्यांच्या हस्ते ‘शब्दगंध’ या प्राथमिक काव्यसंग्रहाचे प्रकाशन झाले. यावेळी प्रा. सुवर्णा मुळजकर आणि डॉ. अल्पना बापट यांच्या हस्ते शिरवळकर यांचा सत्कार करण्यात आला.
कार्यक्रमात सचिन बोर्डे आणि पूनम पाटील यांनी सादर केलेल्या ‘सुशिगंध’ या विशेष सादरीकरणाने उपस्थितांच्या मनाचा ठाव घेतला. सुहास शिरवळकर आणि सुगंधा यांच्या सहजीवनाचा प्रवास, ‘बॉबी’ कारची आठवण, बेरोजगारीच्या काळातील संघर्ष आणि त्या काळात मिळालेली खंबीर साथ या आठवणींनी वातावरण भावुक झाले.
यावेळी झालेल्या काव्यमैफलीत सुमारे २५ कवींनी सहभाग नोंदवला. चौथ्या पर्वाच्या विजेत्या म्हणून पूनम पाटील यांची निवड झाली. तिसऱ्या पर्वाचे विजेते आनंद दीक्षित यांचाही गौरव करण्यात आला. सचिन बोर्डे आणि पूनम पाटील यांनी सूत्रसंचालन केले. संयोजन देविना कुलकर्णी आणि राहुल वळंके यांनी केले. विक्रम कुलकर्णी यांनी आभार मानले.