देहूरोड, ता. २१ : सध्या उन्हाळ्यात सकाळपासूनच तापमानाचा पारा वाढत असून त्याचा फटका शालेय विद्यार्थ्यांना बसत आहे. शाळेत ये-जा करताना विद्यार्थ्यांना प्रचंड उकाडा सहन करावा लागत आहे. त्यामुळे शाळांच्या वेळांमध्ये बदल करण्याची मागणी देहूरोड, किवळे परिसरातील पालकांकडून केली जात आहे.
दुपारच्या सत्रातील विद्यार्थ्यांची अवस्था अधिकच बिकट होत असून थकवा, डोकेदुखी आणि डिहायड्रेशनच्या तक्रारी वाढल्या आहेत. पालकांमध्येही चिंतेचे वातावरण निर्माण झाले आहे. प्रशासनाने याकडे तातडीने लक्ष देण्याची गरज व्यक्त केली जात आहे.