लोणावळा, ता.९ : देशाच्या सीमेवर प्राणाची बाजी लावून लढणाऱ्या जवानांना दिवाळी सणाचा आनंद घेता यावा तसेच सणाचा गोडवा अनुभवता यावा, यासाठी अनाम प्रेम परिवाराच्यावतीने देशाच्या सीमेवर कार्यरत असलेल्या सुमारे २० हजार सैनिकांना दिवाळीचा फराळ पाठविण्यात आला.
अनाम प्रेम परिवार हा समाजातील दुर्बल, दुर्लक्षित व वंचितांसाठी कार्यरत असणारा परिवार म्हणून परिचित आहे. राज्य आणि देशातील काही शहरांमध्ये अनाम प्रेम परिवाराच्या वतीने सैनिकच नव्हे; तर पोलिस, बेस्टचे वाहक-चालक, अनाथ मुले, देहविक्रय करणाऱ्या निराधार महिला, रुग्णालयातील परिचारिका अशा विविध वर्गातील कर्मचाऱ्यांसाठी उपक्रमांचे आयोजन केले जाते.
घरापासून हजारो किलोमीटर दूर असलेल्या सैनिकांना घरगुती फराळ खाण्याचा आनंद घेता यावा यासाठी फराळ पाठविण्याचा उपक्रम अनाम प्रेम परिवाराच्यावतीने गेल्या काही वर्षांपासून राबविण्यात येत आहे. यंदाही लेह, लडाख, अरुणाचल प्रदेश, आसाम, राजस्थान, जम्मू-काश्मीर, पंजाब- अमृतसर अशा सीमावर्ती भागातील सैनिकांसह नाविक दल आणि हवाई दलाच्या जवळपास वीस हजार सैनिकांना हा फराळ पाठविण्यात आला. या फराळाच्या प्रत्येक बॉक्समध्ये चिवडा, चकली, लाडू व शंकरपाळी हे पदार्थ पाठवण्यात आले.
परिवाराचे नितीन पानसे म्हणाले,‘‘स्वतःच्या परिवारापासून दूर असलेले सैनिक प्राणांची बाजी लावून देशासाठी लढत असतात. बलिदान देतात. याची जाणीव ठेवत त्यांनाही सणांचा आनंद लुटता यावा, या हेतूने मुंबई, पुणे, कोल्हापूर, गोवा तसेच इतर ठिकाणांहून दिवाळीचा फराळ तयार करण्यात आला.’’

फराळाच्या बॉक्सेसबरोबर देशाच्या सीमेवरील सैनिकांसाठी मुले आणि कुटुंबील सदस्यांकडून स्वतःच्या हाताने बनवलेली शुभेच्छा पत्रे सुध्दा पाठविण्यात येत आहेत. या उपक्रमाद्वारे सैनिकांप्रती कृतज्ञता व्यक्त करण्यात येत आहे. - अनिल मोरे, सदस्य, अनाम प्रेम परिवार

LON23B03079