लोणावळा, ता. ८ : करंडोली येथे लग्नाच्या वरातीमध्ये लावलेल्या ‘डीजे’चा आवाज कमी करा सांगितल्याच्या रागातून टोळक्याने केलेल्या हल्ल्यात सहाजण जखमी झाले आहेत. याप्रकरणी पोलिसांनी बारा जणांवर गुन्हा दाखल केला असून, अकरा जणांना अटक करण्यात आली आहे. शुक्रवारी मध्यरात्री साडेबारा वाजण्याच्या सुमारास ही घटना घडली.
अनंता केदारी, नीलेश केदारी, नरेश केदारी, सुरेश केदारी, दत्ता केदारी, अक्षय केदारी, ओम्कार केदारी, विलास गायखे, सुनील भाटवडेकर, सोमनाथ भाटवडेकर, नितीन केदारी, सुरेश केदारी (सर्व रा. करंडोली ता. मावळ) अशी गुन्हा दाखल झालेल्यांची नावे आहेत. याप्रकरणी प्रवीण बाळू चांदणे (वय २८, रा. करंडोली, ता. मावळ) यांनी फिर्याद दिली आहे.
लोणावळा ग्रामीण पोलिसांनी दिलेल्या माहितीनुसार, ‘‘गुरुवारी (ता. ६) रात्री करंडोली येथील सोमनाथ भाटवडेकर यांच्या लग्नाच्या वरातीत मोठ्या आवाजात डीजे लावण्यात आला होता. फिर्यादी प्रवीण यांचा मुलगा लहान असून त्याला हृदयाचा त्रास असल्याने त्यांनी डीजेचा आवाज कमी करा असे सांगितले. त्याचा राग मनात धरून डीजेच्या समोर नाचणाऱ्या आरोपींनी बेकायदेशीर जमाव जमवत अमोल शेलार यांच्यावर कोयता व लोखंडी रॉडने जीवघेणा हल्ला केला. शेलार यांना वाचविण्यासाठी आलेल्या किरण चांदणे, राहुल चांदणे, निखिल चांदणे, बाळू शेलार, बेबीबाई शेलार (सर्व रा. करंडोली, ता. मावळ) यांनाही बेदम मारहाण झाल्याने ते जखमी झाले. पुढील तपास पोलिस निरीक्षक किशोर धुमाळ यांच्या मार्गदर्शनाखाली फौजदार भारत भोसले करत आहेत.