लोणावळा, ता. २ : नांगरगाव येथील श्री स्वामीराज जनकल्याण केंद्र येथे कॅन्सर पेशंट्‍स असोसिएशनच्या वतीने आयोजित मोफत आरोग्य तपासणी शिबिरात ८० जणांनी लाभ घेतला. शिबिरात कॅन्सर पूर्व लक्षणे, त्याचे निदान व इतर तपासण्या करण्यात आल्या. यात रक्त, कान-नाक-घसा तपासणी, रक्तदाब तपासणी, स्त्रीरोग तपासणी, फुफ्फुस तपासणी आदी करून तज्ज्ञ डॉक्टरांकडून सल्ले देण्यात आले. उर्वरित आवश्यक तपासण्या मुंबई येथे मोफत केल्या जाणार आहेत. कॅन्सर किंवा इतर शस्त्रक्रियांसाठी कॅन्सर पेशंट्स एड असोसिएशन सहकार्य करणार आहे. शिबिराकरिता निश्चल इसरानी फाउंडेशनचे प्रायोजकत्व मिळाले. यावेळी असोसिएशनच्या कार्यकारी संचालिका नीता मोरे, उपसंचालिका मीनल परब उपस्थित होत्या. डॉ. रचना मेहरा, डॉ. सतीश कणेकर, डॉ. संजय घिल्दीयाल, डॉ. मीनाक्षी मानकामे यांनी सेवा दिली. शिबिरासाठी असोसिएशनचे राजेश नेरुरकर, श्री स्वामीराज जनकल्याण केंद्राचे महादेव टिकम, रवी कोरगावकर, अभय वैद्य यांचे सहकार्य लाभले.